Press Release of Governor

​AIZAWLAH REPUBLIC DAY 2019 LAWM A NI - 26th January 2019

Aizawl, 26th Jan 2019 : India Republic Day champha vawi 70-na chu vawiin khan Assam Rifles Lammualah lawm a ni a, tukin zing dar 8 khan Mizoram Governor Pu Kummanam Rajasekharan chuan Hnam Puanzar a pawt pharh a. Parade contingent-te a endik hnuah parade contingent 9 ten hnam puanzar chibai an bûk a chháng lêt a; Republic Day thuchah a sawi chhunzawm nghal a ni.

India Republic Day vawi 70-na chu ni chhinchhiah tlak a ni thu sawiin Governor chuan Zoram mipuite zawng zawng te duhsakna chibai a buk a hmasa a. Kum 70 liam ta vawiin ni angah khan India ram chu mipui rorelna ram, Danpui ropui tak hnuaiah mitin intluk tlanga chanvo inang an neih theihna leh a innghahna atan dikna, mimal zalenna, intluktlanna leh inunauna te lungphumah neiin ‘democratic republic’ ram pakhat ni turin a lo inbawl hrang tan a ni a ti a. "Chutih rual chuan tun dinhmun kan thlen theihna tura theihtawp lo chhuahtu India ram leh hnam hruaitu hmasa mual liam tawh te kha vawiinah hian rilruah hre rengin anmahni zahna chibai i buk ang u," tiin mipui a sawm a ni.

Kum 70 chhungin India ram chu khawvela mipui rorelna ram lian leh ropui ber pakhatah a lo indin nghet ta a. Hnam hrang hrang, ze inanglo tak takte awm khawmna ram ni mahse, a chhunga cheng mipuite inkara inlungrualna leh inpumkhatna chu khawvel mithmuhah chiang taka tarlanin a awm a ni a ti a. Tunah chuan ram changkang ni tura sawrkar hmalakna leh mipuite beiseina tihhlawhtlin chu thil pawimawh ber a ni tawh a ni a ti. Governor chuan Mizorama inthlanpui hnuhnungber a hlawhtlinna chu sawrkar hnathawkte inpekna leh chumi tluk chiaha pawimawh mipui vantlang thlawpna a nih thu a sawi a. "Boruak muanawm tak hnuaiah inthlanna felfai tak kan nei thei kha a lawmawmin thil chhinchhiah tlak tak a ni a. Sawrkar hnathawkte, dan leh thupek kengkawhtute, khawtlang mipuite, NGO-te leh Kohhrante, a bik takin Mizo People’s Forum (MPF) chungah pawh an thawhrimna leh inpekna avangin lawmthu ka sawi a ni," a ti.

"Ka sawrkar chuan Mizoram hi mahni kut-kea ding a, intodelh turin ruahmanna hrang hrangte siam a, chak taka kalpui a tum a. Sawrkar langtlang leh mawhphurhna la ngam, mipuite innghahna tlak sawrkawr ni turin theihtawp a chhuah dawn a ni," a ti a. Sawrkar inrelbawlna kawngah thuneihna sem zai tur leh a taka Lok Ayukta kalpui thuai turin hmalak tum a nih thu a sawi a. Hnam pasaltha, ram tana nun hlante hriat reng nan an chhungte chhawmdawlna tur ruahmanna pawh a bika siam sak tum a nih thu a sawi bawk a ni.

Hmasawnna huapzo leh ngelnghet, khawngtlang mipuite dinhmun leh ei leh bara ram hmel thlak danglamna turin ruahmanna lian tham, Socio-Economic Development Policy (SEDP) a kalpui dawn a ni tih a sawi a. SEDP chu ramin chakna thahrui a ngahna tihchak leh zualna tur a ni a. Sum sem ringawt a ni dawn lova, project belhchian dawl leh eizawnna tura ruahmanna rintlak siamtute kut tihchakna tur a ruahman a ni dawn a ni a ti. Kum khata mimal sum thawhchhuah zat pawh rampum huapa mimal thawhchhuah zat aia sanga awm chhunzawm zel theih nan theihtawp chhuah a nih tur thu sawiin sawrkar hmasa hun chhunga hmalaknate pawh a tul dan ang zelin a theih chinah chuan chhunzawm a nih dawn thu a sawi bawk a ni.

Dan leh thupek kenkawh that pawimawh zia sawiin Governor chuan Mizoram hi state ralmuang ber a nih chhunzawm theihna tura Mizoram Police te inpekna, taimakna leh thawhrimna hi a chhuanawm tak zet a, an chungah lawmthu a sawi nghal bawk a ni. State ramrite venghim turin a tul ang zela hma lak a ni dawn a. Ramri hrula chengte tan bika hmasawnna leh hamthatna tur ngaih pawimawh a ni ang a. Mizoram Village Level Citizen Registration kalpui turin a tul anga hma lak a ni ang a ti.

Sawrkar chuan thingtlang mipui nawlpui leh kuthnathawktu tam zawkte eizawnna ber, Agriculture a ngai pawimawh chhunzawm dawn tih a sawi a. He sector pawimawh tak huangah hian tunlai thiamna sang ber ber leh thlai thar hlawk dante pawh kalpui tum a ni a. Organic Farming phei chu uar taka kalpui a ni dawn a ni a ti a. Horticulture, Fisheries, Veterinary and Animal Husbandry leh Sericulture-ah te nasa takin hna thawk a ni dawn a. Hengah te hian a hlawkna tak tak thawhchhuah tumin kut thlak nasa deuh bik dawn a ni a ti.

Hmasawnna ruhrel changtlung neih hi ram hmasawnna tehfung pawimawh tak a ni a, Mizoram ang tlangram chhengche takah phei chuan kalkawng tha nei tura hmalakna hi hna hautak a tling tih kan hre tlang vek awm e. Heti chung hian sawrkar chuan state chhung inkalpawhna kawngpui tha nei tur leh state thenawm te nen inkalpawhna tura kawngpui tha nei turin theihtawp chhuah a tum a, a tul a piang chu a ti zel dawn a ni a ti. Governor chuan power a intodelhna turin nizung leh thli chakna hmanga power siamchhuah leh kawng hrang hranga kawlphethaa intodelhna turin nasa taka hma lak tum a nih thu a sawi a. Power siamchhuah, a hrui thlun zawm leh a semchhuah kawngah nasa zawka tanlak tum mek a ni a ti bawk.

Faina kawnga hmasawn pawh sawrkarin a ngaipawimawh tih sawiin Mizoram chuan kumin chhunga State fai ber nih a tum a; chumi piah lamah Mizoram chhunga khawpuite leh thingtlang khuate chu mihring chenna hmun fai berah hlankai a tum a ni a ti. Sawrkar thil tum pawimawh tak pakhat chu mi zawng zawng banphaka damdawi inenkawlna tha zawkte chhawpchhuah a ni a ti a. A bultan nan tun hnai khan thisen mamawhtuten thisen sawngbawlna man an chawi thin pawh tihtawp nghal a ni a.The Mizoram State Health Care Scheme pawh ennawn a, siamthat ngai laite siamthain kalpui a ni zel dawn a ni a ti. Governor chuan zu khapna dan siam a nih thuai tur thu a sawi a, khawtlang mipuite nen thawkhovin theihtawp chhuahin zu leh ruihlo do zel a ni dawn a. The Mizoram Liquor (Control & Prohibition) Act, 2014 pawh thiah a nih theih nan a tul ang angte tih a ni ang," a ti.

Governor chuan sawrkar ngaihpawihmawh dang pakhat chu zirna chungchang a ni a. Zirna hniam ber atanga a sang ber thlengin tihhmasawn tum a ni a, tun maia hmalakna tur awm nghal chu khawtlang nun leh khawsak dan milin sikul calendar leh sikul kai hunte her rem a ni," a ti. Infiamna huangah pawh chak takin hmalak chhunzawm zel a ni a - Olympic Games kalphung leh inrelbawl dante behchhanin Sports Policy thar pawh siam thuai tum a ni a, he policy hnuaiah hian Infiamna hmunhma te tha zawk sak belh a nih mai bakah Infiammite pawh lawmpuina sum tam zawk pek tum a ni a ti.

Tuna khawpui tihhmasawnna tura hmalak mekte chu chak zawka kalpui a nih tur thu a sawi a. Hemi rual hian thingtlanga chengte leh mirethei zawkte chawikanna chu sawrkar ngaihpawimawh ber pakhat a ni chhunzawm dawn a ni a ti. Aizawl khawpui chhung tawt lutuk pawh sawrkar chuan chinfel a tum a; kawngpui siamthat dan tur ngaihtuahin zirchianna pawh a nei chho mek a. Chief Minister hovin mithiamte nen kawngpui survey thawhkhatna phei chu neih a ni tawh a ni a ti. Sumdawnna kawngah pawh tanlak chhoh zel a nih tur thu sawiin Act East Policy zulin Myanmar leh Bangladesh te nen ramria insumdawn tawnna chu chak takin bawhzui a ni ang a ti.

“Tunah hian, Zoram mipui zawng zawngte in theih tawpa sawrkar thawhpui leh thlawp zel turin ka sawm vek che u a. Mizoram hi India ram chhunga state hmasawn bera siam tur chuan Zoram mipuite kan pawimawh ber awm e. Chuvangin kan state hmasawnna turah hian mi mal tin te hi kan pawimawh dan a inangtlang vek a ni. Sawrkar hnathawkte inpekna tello phei chuan sawrkar a kal thei lova; sawrkar hnathawkte zawng zawng pawh tan la zual leh turin ka sawm nghal bawk a ni", a ti.

Governor chuan khua leh tui chhuanawm tak ni mek Mizoram mipuite chu ram Danpuia inziak thu pawimawh tak tak - khua leh tui mawhphurhna zawng zawng leh a dangte chu chanvo leh mawhah la thar leh theuh turin a sawm a ni.

Kumin Republic Day Ceremonial Parade-ah hian Contingent 9 an awm a. Ceremonial Parade hi Parade Commander DSP Pu C. Lalsawta leh 2nd Parade Commander DSP Pu Lalpianthanga ten an kaihruai a. Armed contingent 6 leh Band Parties 3 te an tel a ni. 5th IR Bn, 3rd BN MAP leh 1st BN MAP te chuan Parade thiam lawmman pakhatna, pahnihna leh pathumna an la a ni. Republic Day lawmnaah hian Governor chuan Governor’s Gold Medal - Pu F. Lalhmingliana, Inspector, 1st BN MAP leh Pu K. Lalrohlua, Hav, 1st BN MAP te hnenah a hlan a. Governor's Silver Medal chu Pu KT Beikhai, Inspector, 5th IR BN, Pu R. Lalrumliana, Inspector, 2 BN MAP leh Pu Zoramsanga Sailo, Sub- Inspector, SI(UB), CID Crime te hnenah a hlan bawk a. Fireman PC Remruatdika chuan India President hnen atangin hnathawh that lawmman a dawng dawn tih puan a ni a. Lammuala lawmna inkhawm zawhah hian Raj Bhavan-ah sawm bikte tan ‘At Home’ programme-in a chhunzawm a ni.

Written by: Malsawmsanga, MIS, PRO to Governor Dated: 26th Jan 2019