Press Release of Governor

DGP kalchhuak tur Pu SBK Singh-a'n Governor Hari Babu Kambhampati kawm - 13th January 2022

Aizawl the 13th January 2022 : Vawiin chawhma khan Raj Bhavan-ah Director General Of Police kalchhuak tur Pu SBK Singh, IPS('88) chuan Governor Hari Babu Kambhampati a kawm.

Governor leh DGP kalchhuak tur inkawmnaah hian Governor Hari Babu Kambhampati chuan Pu SBK Singh-a chu Mizorama a awm chhungin tha taka a hna a thawh avanga lawmawm a tih thu a sawiin a hna thar pawh tha taka thawk chhunzawm turin duhsakna a hlan a ni.

Pu SBK Singh, IPS('88), DGP, Mizoram chuan kum 2 leh thla 5 chuang Mizoram a awm chhungin dan leh thupek kenkawhtu Mizoram Police te thuamchak leh tih hmasawnna kawngah hlawhtlinna tam tak a awm tih a sawi a. DGP a nih chhhung hian Mizoram Police ten hmasawnna lian tak tak an nei tih a sawi bawk a ni. DGP hna a chelh chhungin Mizoram Police a thawhpuite - a hnuailam atanga a hotulu zawng zawng te nen thawhhona duhawm tak an nei thin a. Mizoram sawrkar tana theihtawp a chhuahna kawngah pawh sawrkar hotulute thlawpna a dawn thin avangin lawmthu a sawi bawk a ni.

Pu SBK Singh, IPS('88) hian August 8, 2019 khan DGP hna a rawn zawm a. Tunah hian Delhi lamah a hnathar tur a zawm leh tawh dawn a, Pu Devesh Chandra Srivastava, IPS ( 1995) in a rawn thlak thung dawn a ni.

Written by: Malsawmsanga, MIS, Deputy Director Dated: 13th Jan 2022