Press Release of Governor

​Governor Brig(Dr) B.D. Mishra in sawrkar hotulian te sawrkar hmalakna pawimawh zual sawipui - 12th August 2021

Aizawl, the 12th August 2021: Governor Brig(Dr) B.D. Mishra (Retd) chuan vawiin khan Mizoram sawrkar hmalakna pawimawh deuh te belchiang turin Home Department, Health Department and Public Works Department hotulian te Raj Bhavan-ah a kawm a. Heng department aiawh te hian an hmalakna pawimawh zual te sawi na hun an hmang a ni.

Governor Brig (Dr) B.D. Mishra (Retd) leh official te inkawmnaah hian Mizoram leh Assam ramri buai chungchanga Mizoram sawrkar dinna, hmalakna kal mek leh hmachhawp te ngaihthlak a ni a. Home Department aiawhin Pu Vanlalngaihsaka, Secretary leh Pu David H.lalthangliana, OSD ten report kimchang tak an pe a ni. Covid-19 hrileng dona kawnga Mizoram sawrkar hmalakna pawimawh tak tak kal mek te leh sawrkarin hmachhawp a neih te Pu R.Lalramnghaka’n sawi na hun a hmang leh a. Hemi hnu hian Mizoram tan mai ni lo, India Hmarchhak leh India ram tana Project pawimawh tak thawh mek - Kaladan Multi-Modal Transit Transport Project chungchangah a enkawltu PWD lam atangin Lalruatkima, Chief Engineer (Highways), PWD chuan report a pe a. He project a khawmuan chhan te chiang takin a sawifiah tel bawk a ni.

Sawrkar hotulian te report pek a ngaihthlak hnuah Governor Brig(Dr) B.D. Mishra (Retd) chuan a ngaih dan te a sawi a. Ramri buaina chungchang pawh ralkhat atanga a lo hriat aia a chian thar sawt thu sawiin buaina chinfel kawng chu silaimu hmetpuak tawh miah loa boruak muanawm tak nen zawh a tul hmasa a ni a ti. Thuneitu sang zawk – state level anga ramri buai chingfel tura indawrna atan ramri hrula district-ah te boruak muanawm a awm ngei ngei a tul hmasa a. Ramri hrula a boruak muanawm siam tur chuan ramri hrul district hotute – Mizoram lama Deputy Commissioner leh Superintendent of Police te leh Assam lama Deputy Commissioner leh Superintendent of Police te an pawimawh hmasa ber a ti. Governor chuan ramri hrula district thuneitute hi state pahnih karah boruak muanawm a awm theih nan an inthian that a ngai a, nitin emaw a theih anga zingin an in biak tawna, chanchin an in hrilh reng a tul a. Forest Official te pawh Police hruaia ramri buai lai an tlawh loh a ngai bawk a ni a ti. Covid-19 hrileng dona kawngah Mizoram Sawrkar a che tha tawka a hriat thu a sawi a. Amaherawhchu, hrileng tawp hun a hriatloh avangin Health Department chu damlo khum siambelh kawngah te, Covid 19 hriveite enkawlna bik Hospital siambelh kawngah te, Oxygen a tam thei ang ber khawl chungchangah te, Ventilator tam zawk neih belh chungah te, a thawktu in lak belh kawngah te, Vaccine chak zawka pe tur te, hrivei te enkawlna bik damdawi tam zawk nei tur te leh Covid 19 Hrileng dona kawnga fimkhurna mipui hnena nasa zawka zirtir kawngah te tha thlah lova tangmar pat turin a chah a ni.

Governor Brig(Dr) B.D. Mishra (Retd) chuan ramri buaina avanga Mizoram mamawh lakluhna kawngpui- National Highway 306 (NH 306) dan pin a ni thin chu thil tha lo take, mihring puite dikna leh chanvo hnualsuatna a ni a ti a. He harsatna chinfel dan awlsam ber chu Kaladan Multi-Modal Transit Transport Project(KMMTTP) a rang thei ang bera siam zawh a ni a ti. Governor chuan PWD hotute chu he project pawimawh tak chak zawka thawk tur leh project hnathawhna tur sum tang mek pawh nawrchhuah a nih theih nan Central sawrkar nawr turin a chah a. A tul chuan Mizoram Governor a nihna ang pawhin Central Sawrkar dawr a inhuam thu a sawi bawk a ni. Tunah chuan NH 306 hi Mizoram nunna hnar a ni rih a, mahse; KMMTTP siam zawh a nih hun chuan Mizoram tan nitin mamawh leh bungraw chawkluhna kawngpui zau zawk leh awlsam zawk a awm dawn tih a sawi a. He kawngpui hi Mizoram tan mai ni lo, India hmarchhak leh India ram pum tana project pawimawh tak a ni tih a sawi bawk a ni.

Written by: Malsawmsanga, MIS, Deputy Director Dated: 12th Aug 21