Press Release of Governor

​Governor Hari Babu Kambhampati in Governors' Conference 2021-ah Mizoram State Report a pe - 11th November 2021

Aizawl, the 11th November 2021: Vawiin khan Governor Hari Babu Kambhampati chu Governors & Lt Governors' Conference 2021, Rashtrapati Bhavan, New Delhi a neihah a tel a. He hunah hian Mizoram Sawrkar hmalakna hrang hrangte kimchang takin report a pe a ni.

Union Home Minister Amit Shah in palai kalkhawmte lawmna thu a sawi zawhah Conference hi tan a ni a. He hunah hian President Ram Nath Kovind, Vice President M Venkaiah Naidu leh Prime Minister Narendra Modi te hnen atangin thuchah ngaihthlak a ni a. Governor leh Lt Governor ten anmahni State Report theuh an pek hnuah "Best Practices at Raj Bhavan" tih thupui zirho niin sawihona huna chhun zawm a ni.

He conference pawimawh takah hian India ram hruaitulu te hmaah Governor Hari Babu chuan Mizoram hmasawnna hrang hrang leh hna kal lai te chipchiar takin a sawi a. Mizoramin Covid 19 dona kawnga hma a lakdan danglam deuh bik LLTF/VLTF chungchang te, kohhran, tlawmngai pawl leh khawtlangin sawrkar an thlawp chungchang te pawh a sawilang a ni.

Hridanna pawh tha taka kalpui a nih thu te mihring nuai 12 zingah vaccine lak hmabak tlem te chauh an awm tawh thu a sawi a. Mizoram sawrkar leh World Bank ten Healthcare leh Health Infrastructure tihhmasawnna atan US Dollar 40 Million project-ah thawhhona thuthlung an ziah fel tawh chungchangte a sawi bawk a ni. Governor Hari Babu chuan Mizoram Sawrkar Flagship programme - Socio-Economic Development Programme(SEDP) chungchangte, Swachh Bharat Mission kalpui mek te, Kaladan Multi-Modal Transit Transport Project (KMMTTP) hnathawh mek te bakah hmalakna langsar zual te a tarlang a ni.

Governor Hari Babu Kambhampati in Governors' Conference 2021 a Mizoram State Report a pek hi kimchang zawkin a hnuai link atang hian a lakchhuah theih : dipr.mizoram.gov.in/post/state-report-of-mizoram-of-mizoram-by-dr-hari-babu-kambhampati-honble-governor-at-the-conference-of-governors-at-rashtrapati-bhavan-new-delhi-on-11th-november-2021

Written by: Malsawmsanga, MIS, Deputy Director Dated: 11th Nov 21