Press Release of Governor

​GOVERNOR IN AIIMS LEH ISCO BUATSAIH CANCER CHUNGCHANG LEH INVEN DAN MIPUI TAN BUASAIH A HMANPUI - 19th January 2019

Aizawl, 19th Jan 2019 : Vawiin khan Aijal Club-ah Hmarchhak bial mipuite puala Cancer chungchanga leh a invendan inzirtirna pawimawh tak, NEC-Pink Chain Campaign 2019 buatsaih meka programme pakhat, Mithiamte fuankawmna leh sawihona hun, Conclave chu neih a ni. He Campaign hi North Eastern Council(NEC) leh Pink Chain Campaigners(PCC) - All India Institute of Medical Sciences(AIIMS), Delhi leh Indian Society of Clinical Oncology(ISCO) ten an huaihawt a ni a. MIzoram Governor Kummanam Rajasekharan chuan he Conclave hi a hmanpui a. Mizoram Lok Sabha MP Pu CL Ruala pawh he hunah hian a tel a ni.

Governor Kummanam Rajasekharan chuan Cancer natna tihbaiawm tak chungchang leh a pumpelh dan inzirtirna chu hna pawimawh bik a ni a ti a. Mizoram tan ngat phei chuan state dang te aiin a pawimawh leh zual tih a sawi a ni. Cancer chungchang, a lo lanchhuahdan te, inenkawl dan te leh a invendan te chu Mizo mipui ten kan hriatthiam zawngin a tawngkam tluangtlam zawk thlenga inzirtir uar zawk pawh kan mamawh tawh takzet a ni a ti a. Mizoram chhunga Cancer hluar deuh - Chawkawng, Chuap, Pumpui, Chhul hmawr leh Hnute Cancer avangin chhungkaw tamtak lungngaiin an rum mek a. Mi tam zawk ten Cancer hi a stage hmasa lama hmuhchhuah chuan a la tihdam theih a ni tih an hriat a; mahni in cancer vei leh vei loh an inhriatdan te pawh zirtir sauh sauh a tul tak zet a ni a ti.

Mizoram chhunga Cancer veiten an veichhan langsar zual chu - Sarep/thlai rep eitam, Zu leh ruihlo chin uar, Vaihlo leh a kaihhnawih khawih nasat bakah nitin hun hmandan hrisel lo lutuk te a ni tih mithiamte chhuichhuahdan a ni tih a sawi a. Heng thil thalo te hi sim theih a nih thu sawiin Governor chuan mithahnem ngaite Campaign na zarah Vaihlo kaihhnawih khawih pawh kum 2009-10 a 67.2 % ni thin kha kum 2017-18-ah chuan 57.8% ah a tlahniam tawh tih Global Adult Tobacco Survey(GATS) chuan an tarlang a ni a ti a. Hei hian thahnem ngai taka inzirtirna chuan awmzia a nei tih a ti lang chiang hle a; chuvangin cancer thlen thei thil leh a pumpelh dan bakah cancer vei ten hma zawka an lo inhmuhchhuah ve theih dan te chu Zoram mipui zawng zawng ten kan hriatchian zawka, kan inzirtir tawn reng a pawimawh hle a ni a ti.

Thusawitu dang, Lok Sabha MP Pu CL Ruala chuan National Cancer Registry kum 2013 atanga Aizawl Civil Hospital a kalpui a nih atangin mihring tam lama chhutin Mizoramah cancer vei state dang te ngaihtuah chuan kan tam bik tih nem ngheh a ni a ti a. Sawrkar pawhin theih tawp chhuahin State Cancer Institute pawh phuisui zawkin a din tawh a. Inzirtirna leh invenna kawngah erawh nasa zawk tan lak a tul thu a sawi a ni. Pu CL Ruala chuan AIIMS & ISCO mithiam ten Cancer chungchanga mipui inzirtirna Mizoram Doctor te thawhpuiin Mizoramah an rawn nghat chu Zoram mipui tan thil lawm awm tak a ni a ti a. He inzirtirna kalpui mek leh Mithiamte sawihona atanga mipuite hnena damreina atan thil pawimawh puanzarte chu mipuiin kan bengkhawn an zawm ngei pawh a ngai tih a sawi a. NEC Pink Chain Campaign - 2019 kaltlanga inzirtirna chuan nunna tamtak a chhanhim ngei a beisei tih a sawi a ni.

Conclave-ah hian Hmarchhak biala State tinte leh State pakhat bika cancer hluar zual te ngun taka sawiho leh chhuiho a ni a. Mizoramah chuan Pumpui Cancer a hluar bika, khawvel pum huapa Pumpui Cancer tamna Japan nen a inangkhat a ni. Hei hi mithiamte chuan, Tuibur, Sahdah, Vaihlo zuk chi, Vaihlo hmuam leh thial chi, Kuhva bakah Sarep leh Chawhmeh rep ei leh chin luat vangah an puh a ni.

He Conclave-ah hian cancer mahnia hmuhchhuah leh hriat awl deuh bik - Hnute Cancer( Breast Cancer), Chhulhmawr Cancer(Cervical Cancer), Chuap Cancer( Lung Cancer) bakah nghawng chin chunglam-chawkawng, lu leh hmai Cancer(Head and Neck Cancer) te a tir lama a rawn lanchhuahdan leh mahnia lo inhmuhchhuahdan te mipui hriat atan an tarlang a: Hetiangin Cancer leh a lanchhuahdan - Hnute Cancer - hnute leh hnute hnuaia bawk, Hnute lenzawng leh pianzia danglam, Hnute atanga tuihnang chhuak, hnute hmur tlum leh a pangai aia rawn nem thut, hnute rawngdanglam leh ze neia tial rawn insiam bakah hnute vun, hmur leh a chhevel a danglamna rawn insiam, Chhul Hmawr Cancer- Awmze nei lova serh atanga thichhuak, Period hun inthlak danglam thut thut, Serh anga bawlhhlawh danglam deuh chhuak,khel leh chawn na, Tai na, Zun leh ek a thisen tel leh hmeichhe nih phunga danglamna chidang te, Chuap Cancer - Awmze nei lova taksa hah leh chau ngawih ngawih, Khuh nasa, Awmze nei lova thawk harsa leh boruak hip tur tlakchhamna, Awmbawr na, Chawei tui thei lo, khuha Khak tam leh khaka thisen khuhchhuak leh Chawkawng leh lu lama Cancer - Nghawngna leh nghawnga hnawhtu awm, Hnar atanga thisen chhuak, Thawk rimchhia, Hrawk thip leh ka chhunga pem na si lo dam thei si lo awm, Hmui, ka leh Hahni a bawk awm, Chaw leh tui lemluh harsat, Ka chhung thenkat laia vunrawng sen, var emaw rawng thim lam rawng a insiam danglam, Bengna leh awmze nei lova ka chhunga thisen chhuak, kar 6 chhung aia rei awchhang leh fiahlo te an ni.

NEC-Pink Chain Campaign 2019 Organizing Team a hotu lawk deuh te chu - Program Director Pu Gaura Kishor Rath, Program Incharge Pu Abhishek Shankar leh Program Co - Incharge Pu Sachidanand Jee Bharati te an ni a. Anni hnuaiah hian Co-ordinator 6 an awm a. Dr Eric Zomawia, State Nodal Officer, NCD, Mizoram leh Dr. Zothankima, HOD, Radiation Oncology, State Cancer Institute, MIzoram ten lo puibawm a. Conclave-ah hian Phailama Doctor thiamte leh Mizoram Doctor thiam tak tak ten hun then 4-ah cancer chungchanga thupui then hrang hrang uluk taka thlur bingin sawihona leh inrawnkhawmna an nei a ni.  

Dated: 19th Jan 20 19