Press Release of Governor

​GOVERNOR IN AMC HOTUTE LEH UD&PA HOTUTE AIZAWL KHAWPUI ENKAWL DAN A ZAWT - 11th April 2016

GOVERNOR IN AMC HOTUTE LEH UD&PA HOTUTE AIZAWL KHAWPUI ENKAWL DAN A ZAWT

Aizawl 11th April 2016: Vawin ah khan Governor’s Conference Hall, Raj Bhavan ah Governor Lt Gen Nirbhay Sharma (Retd.) chuan Aizawl Munipal Corporation hotute leh Urban Development & Poverty Alleviation Department official te kawm in Aizawl khawpui tih hmasawnna tura ruahmanna kalpui mek te leh hmachhawp te a zawt.

AMC leh UD&PA Official te hnen atanga ruahmanna hrang hrang kalpui mek a ni chu lawm awm a tih thu sawiin Governor Lt Gen Nirbhay Sharma (Retd.) chuan mipui te tana hmalakna te chu party politics thil a hman tangkai a ni tur a ni lo a ti a. Aizawl Master Plan in a tak ram a lo thlen theih nan te, Aizawl khawpuia lirthei tlandan felfai taka siam, bawlhhlawh dahbo leh sawngbawl dan hrisel zawk leh khawpui chhunga chenna insak dan kalphung felfai zawk kalpui a nih theih nan AMC in hnathawh tur tam tak a nei a, tun aia nasa zawka department te nen an inbiak pawh a ngai a ni a ti.

Aizawl Municipal Corporation chu India ram a Municipal Corporation tha ber ni thei a nih thu tarlang in khawpui chhunga insak dan felfai zawk ruahmanna leh khuahkhirhna kenkawh chungchang ah State Disaster Management Authority rawnna chang AMC in a hriat a ngaih thu a sawi a. Aizawl khawpui chhunga chenna in tin te chu a chhunga chengte leh midang tan a him tawk em tih enfiah theih turin disaster audit hmanga endik a ngai a ni a ti. AMC hotute chu Aizawl khawpui tih thawl nana ruahmanna siam tura chah in tun atanga hmalak a nih loh chuan kum reilote chhungin Aizawl chu chenna tlak loh khawp in a tawt anga, lirnghing bakah khuarel chhiatna hrang hrang lakah tun aia let tam takin a him lo zawk dawn a ni a ti a. Department hrang hrang ten AMC an thawhpui a pawimawh thu sawiin Aizawl khawpui chhunga hmalakna reng reng chu Aizawl Master Plan rawn chunga kalpui zel a pawimawh chho telh telh dawn a tih official te a kawmna ah Governor chuan a tarlang bawk a ni.

Meeting ah hian Pu P.C. Lalhmingthanga, Mayor, AMC, Pu Rodney L. Ralte, Secretary to Governor, Pu Kannan Gopinathan, Aizawl District Bawrhsap, Pu Lalringliana, Deputy Mayor, AMC, Dr.H.Lalthlangliana, Municipal Commissioner leh UD & PA hnuaia official leh engineer te an tel a ni.

WRITTEN BY MALSAWMSANGA MIS, IPRO TO GOVERNOR, DATED: 11TH APRIL 2016