Press Release of Governor

GOVERNOR IN AYUSH DAMDAWI HMANGA INENKAWLNA KUT - AROGYA MELA 2020 HAWNG - 5th March 2020

Vawiin khan Governor P.S. Sreedharan Pillai chuan Dawrpui Multipurpose Centre-ah Ayush Damdawi hmanga inenkawlna leh inzirtirna kut, AROGYA Mela(Health Fair) chu a vawi 5 na atan a duh leh mamawh apiang chhim theih turin a hawng a. Ministry of AYUSH, Govt. of India buatsaih AROGYA Mela(Health Fair) hi ni 5-7 March 2020 chhungin Dawrpui Multipurpose Centre-ah hian neih a ni dawn a ni.

Khuallian Mizoram Governor Sreedharan Pillai chuan India ram state lian zawkah te chuan AYUSH damdawi an hman nasat thu leh India ram Prime Minister pawhin theihtawp chhuaha a chawilar thu sawiin, Mizoramah AYUSH damdawi hmanga hriselna kawnga hmalak naah theihtawp chhuah a in huam thu asawi a, Mizo mipuite chu AYUSH damdawi hmang tangkai tur leh he Health Fair a lo tel tura a sawm thu a sawi a ni. Governor chuan Ayush chu inenkawl damna kawng khat a ni a; Medical system dangte tana pawi zawnga hmalakna a nil ova; inenkawlna him leh hmasang atanga hlawhtling taka lo hman thin, Damlo enkawlna kawnga rintlak leh Medical Treatment System chidangte ti phuisui tu a ni a ti a. Ayush Damdawite chu thlai leh hnimhnah atanga siam vek a nih avangin mihring taksaah nghawng tha lo a nei lo a. Mizoram pawh Ayush hmanga inenkawlna hi kan hmelhriatchhoh leh zual a pawimawh hle a ni a ti. Mizoramah ramhmul Damdawi siamna tur hnimhnah leh thlai tam tak a awm tia hriat a nih thu a sawi a. Mizoram tan Ramhmul damdawi siamchhuahna tura hmalak leh kuthnathawktute zinga ramhmul damdawi chin leh lakkhawm dan inzirtirna nasa neih a nih phawt chuan state tan hmasawnna kawngkhatah siam belh a nih phah dawn a ni a ti a. India ram state zingah Kerala bikah chuan Ayush inenkawlna avangin Medical Tourism nasa takin kalpui a ni tawh a; sum hailuhna tha tak a nih bawk avangin Mizoramah pawh he thil hi kalpui theih nia a hriat thu a sawi bawk a ni.

Khualzahawm Health Minister Dr.R.Lalthangliana chuan Pathianin kan rama ramhnim damdawi tha tak tak adah te haichhuak turin District tinah awareness neih a pawimawh zia leh he AROGYA Mela hi chumi atana programme pawihmawh tak anih thu a sawi a. India rama Medicinal Plants a pakhatna ni thei tura project a thehluh te a hlawhtlin theih nana AYUSH Ministry-ah rawtna a thlen tawh tih sawiin Secretary te pawh a nawr reng thu a sawi a. He hmalaknaah hian Central Sawrkar hotute dawr kawngah hma la chhunzawm turin Governor pawh a ngen tel bawk a ni. Mizoram Sawrkar pawhin Ayush inenkawlna a ngaih pawimawh em avangin Directorate hran pawh nikumah din a ni tawh a. Chak taka hmalak chhunzawm a ni dawn a ni a ti.

He Health Fair hawnna inkhawm hi H.Lalengmawia, Secretary Health & Family Welfare Department in kaihruaiin, Health Secretary chuan Mizorama AYUSH than chhoh dante leh hmasawn dan te a sawia, India sawrkarin a ngaihpawimawh em avangin nasa taka AYUSH damdawi hmanga hriselna chawisan a ngaihthu a sawi a. Dr. Z.R. Thiamsanga, Vice Chairman, H&FW Board, State Health official te leh Central lam atanga mithiam rual lo kalkhawmte pawh he health Fair hawnnaah hian an tel a ni.

He hunah hian Dr.S.Mara Thansiami, Deputy Director, Directorate of AYUSH in Mizorama hriselna kawnga an hmalakna chi hrang hrang te report a pe a. Dr. Baiduriya Bhattacharjee, Research Officer(Medicine), Scientist –I, Homoepathy pawhin thusawina hun a hmang a. He Health Fair ah hian stall 19 hawn ani a, Ministry of AYUSH, Govt. of India atangin Council pasarih leh Mizoram chhung atangin mimal leh department hrang hrang 12 ten an thilsiam chhuah leh ramhmul damdawi hrang hrangte an phochhuak ani.

March 6-7 chhungin athlawna inentirna buatsaih ani dawn a, AYUSH Doctor thiam tak tak ten natna chi hrang hrang an en anga, damdawi tha tak tak a thlawna sem ani dawn bawk ani. Ramhmul damdawi lama tui mite tan pawh mithiam rawn tur an awm reng dawn bawk a. He Health Fair denchhen hian tukin zingkar khan Aizawl F.C leh Mizoram Badminton Association ten nen Walkathon neih a ni bawk a ni.

Written by: Malsawmsanga, MIS, PRO to Governor    Dated: 5th Mar 2020