Press Release of Governor

​GOVERNOR-IN CADC HOTUTE A KAWM - 28th September 2016

GOVERNOR-IN CADC HOTUTE A KAWM

Aizawl the 28th September 2016: Mizoram Lt Gen Nirbhay Sharma chuan vawiin khan Chakma Autonomous District Council (CADC) hotute Raj Bhawan Conference Room-ah a kawm a, CADC huamchhunga hmalakna leh mamawh hrang hrang a sawipui.

Larsap chuan meeting koh chhan sawiin CADC hnuaia hmasawnna kalpui mek-ah CADC leh sorkar department-te thawhhona tha zawk an neih theih dan tur sawiho a ni tih a sawi a, Autonomous District Council-te chu a beisei anga hna an thawk chak lo chu pawi a tih thu a sawi bawk. CADC hnuaia hnathawk tur lak chungchangah Larsap chuan Dan-in a phut angin a pawmpuina (approval) tel lova thawktu lak chu phalloh a nih thu hrilhin hnalakna kalpui an neih reng reng chu titawp turin a hrilh nghal. CADC area-ah a bik takin ziak leh chhiar (literacy) hniam lutuk te, zirna, hriselna leh skill dvelopment lamah tanlak a tulzia sawiin Larsap chuan CADC chhungah henga an dinhmun dik tak zirchianna nei a, a hnenah report thehlut turin a hrilh bawk.

CADC hotute chuan Larsap hnenah sum leh pai (revenue) dehchhuahna kawnga an hmalakna leh hmachhawp hrang hrang - hmunphiah mahal tender te, bus service, driving school, bazaar building, small scale industries, chhiah chi hrang hrang bakah duichhuani leh mineral water sawngbawlna hmun tur an din mek thu an tarlang a. Ziak leh chhiar bakah hriselna lamah mipuite hrilhhriat zau nan awareness campaign an mamawh thu an thlen bawk.

Vawiin meeting-ah hian CADC aiawhin CEM KK Tongchangya, Chairman Daya Chandra, Executive Secretary Purmendu Chakma, I&PRO Prabin Chakma, LO PK Tongtongya te an tel a. Mizoram sorkar atangin District Council & Minority Affairs Secretary Pu Rodney L.Ralte, Health Commissioner Pu Lalrinliana Fanai, Secretary to Governor Pu Biaktluanga, Sr.Dy.AG Pu Timir Bhadra, Labour, Employment & Industrial Training Director Pu Lalhmachhuana Hauhnar bakah sorkar officials engemawzat an tel a ni.

WRITTEN BY MINA ZOLIANI, MIS, PIO TO GOVERNOR, DATED: 28TH SEPTEMBER 2016, 3:16 PM