Press Release of Governor

GOVERNOR-IN LADC LEH SORKAR MI PAWIMAWHTE KAWM - 27th September 2016

GOVERNOR-IN LADC LEH SORKAR MI PAWIMAWHTE KAWM

Aizawl 27th September 2016: Mizoram Governor Lt.Gen.(Rtd) Nirbhay Sharma chuan vawiin khan Lai Autonomous District Council hotute leh Mizoram sorkara Officials pawimawhte nen Raj Bhawan Conference Room-ah meeting pawimawh tak an nei a. He meeting-ah hian LADC atangin CEM Pu V.L.Hmuaka, Executive Secretary Pu H.Lalremenga, Planning & Development Officer Pu Lallawmsanga leh LO LADC House Pu Thanliana Zathang an tel a. Mizoram sorkar atangin District Council & Minority Affairs Secretary Pu Rodney L.Ralte; Health Commissioner Pu Lalrinliana Fanai; Secretary to Governor Pu Biaktluanga; Finance Commissioner Pi L.N.Tochhawng; Finance Secretary Pu Lalropara; Labour, Employment & Industrial Training Commissioner Pu Benjamin-a; Law Secretary Pi Marli Vankung, Planning Dept. leh DP&AR bakah sorkar officials engemawzat an tel.

Mizoram Larsap Pu Nirbhay Sharma chuan meeting kohna chhan ber chu Autonomous District Council huamchhunga hmasawnna kalpui a nih mek dan leh hmalak zel dan tur sawiho a, District Council leh state sorkar inkara thawhhona tha zawk nen hnathawh zel dan tura rawtna siamte a ni tih a sawi a. LADC area chhungah a bik takin hriselna, zirna leh skill dvelopment lamah hmasawn a tulzia leh chu chuan mipuite chu chhawrtlaka siamin eizawnna kawng hrang hrang pawh siam sak a ti awlsam tur thu a sawi bawk.

Vawiin meeting-ah hian LADC hotute chuan an hmalak dante leh harsatna an tawhte Larsap hnenah an thlen a, sorkar department hotute nen an harsatna sutkian dan turte sawiho nghal a ni a. LADC huamchhungah mipuite hriselna, zirna leh eizawnna lam zirchianna ‘survey’ nei turin leh thla khat hnuah ‘survey report’ a hnenah thehlut turin a hrilh nghal a ni.

Mizoram Larsap chuan naktuk ni 28th September-ah MADC hotute leh a tuk 29th September ah CADC hotute chu meeting a neihpui dawn bawk a ni.

WRITTEN BY MINA ZOLIANI, MIS, PIO TO GOVERNOR,  DATED: 27TH SEPTEMBER 2016, 2:56 PM