Press Release of Governor

GOVERNOR IN NATIONAL SEMINAR ON SOCIAL SCIENCE KHARNA HMANPUI - Aizawl 10th September 2016

GOVERNOR IN NATIONAL SEMINAR ON SOCIAL SCIENCE KHARNA HMANPUI

Aizawl 10th September 2016: Vawiin chawhma ah khan Mizoram Governor Lt Gen Nirbhay Sharma (Retd.) chuan Government Hrangbana College Auditorium ah Institute of Indian Languages & Literature(IILL) buatsaih, ni 5 chhung awh National Seminar on Social Science kharna hun a hmanpui.

Seminar kharna hun ah hian thu sawiin Mizoram Governor Lt Gen Nirbhay Sharma (Retd.) chuan hmasawnna kawnga Mizo thalai te daltu lian ber chu hnamdang tawng thiam tam loh a ni a ti. Ziak leh chhiar thiam kawnga Mizoram in hma a hruaina hian Sap tawng leh Vai tawng bakah hnamdang tawng thiam kawngah awmzia a nei lem lovin a lang a; theihna sang tak nei, Mizo thalai te hian Mizo tawng bakah tawng dang thiam tam se nasa takin Mizoram an ti hmasawn anga, dinhmun sang zawkah an vawrh chho ngei ang a ti a. "Mizo ten kan harsatna neih pakhat chu; hnamdang leh ram pawn lam mi huphurhna hi a ni in ka hria a. Thiamna leh zirchhuah tur hnamdang te nen kan inkawmna atang te leh an tawng kan thiamna kal tlanga kan hmuhchhuah tur tam tak hi kan la hmuchhuak thei lova. Kan theihna leh kan thil thiam chak bik na te en chuan hnamdang te hi huphurh mai lova hmachhawn leh intihsiak pui thei kan ni in ka hria", ti in Mizo mipui te rilru put hmang thlak a hun thu leh inhawn zau Mizo mipui te tan a that zawk tur thu a sawi a. "A lehlam ah chuan, Gandhi, Nehru, Patel leh Ambedkar ten theihtawp chhuah a khua leh tui te intluk tlanna an lo zirtir thin kha Mizo khawtlang nunah hian hmuhtur a awm a, hei hi a mawi ka ti in hnamdang te pawh in min entawn tur a ni thung in ka hria", ti in Mizo khawtlangnun a inthliarna a awm ve lo chu ropui a tih thu a Governor chuan a tarlang a ni.

National Seminar on Social Science kharna inkhawm hi Prof. Nitiyanand Pandey, Dean of Education Department, Central University Assam leh Prof. C.E. Jeeni. Chairperson, IILL ten an kaihruai a, Seminar chhung khan tawng chi thum : Mizo tawng, Sap tawng leh Vai tawng hmang in mithiam ten zirtirna an pe a ni.

WRITTEN BY MALSAWMSANGA MIS, IPRO TO GOVERNOR,  DATED: 10TH SEPTEMBER 2016, 2:29 PM