Press Release of Governor

GOVERNOR-IN RUALBANLOTE CAPACITY BUILDING SEMINAR A HAWNG - 4th October 2016

GOVERNOR-IN RUALBANLOTE CAPACITY BUILDING SEMINAR A HAWNG

Aizawl the 4th October 2016:  Rehabilitation Council of India (RCI) bultumin vawiin khan SCERT Auditorium, Chaltlang-ah ni 2 awh tur ‘Regional Seminar on Capacity Building of Rehabilitation Professionals for Persons with Disabilities in NE States’ neih tan a ni a. He Seminar RCI leh RCI-NEZCC, NILD-NERC leh SCERT Mizorama tangkawpa buatsaih hi Khuallian Mizoram Governor Lt.Gen.Nirbhay Sharma, PVSM, UYSM, AVSM, VSM-in hi a hawng.

Mizoram Larsap chuan rualbanlote chanvo pek, anmahni tanpui, chhawmdawl leh thiamna nei tura zirtir hi mitin mawhphurhna leh thinlung takzeta kan thawh tur a ni, a ti a. India ramah mi maktaduai 70 chuangte chu pianphunga rualbanlohna hrang hrang neia hriat a ni a, RCI hmalaknain ramchhunga rualbanlote tan hamthatna chi hrang hrang ruahman zel a ni chu a vanneihthlak hle a ni, a ti. Hmarchhak bialah pianphunga rualbanlote tan hmalakna tur a la tam thu sawiin Pu Nirbhay Sharma chuan Mizoramah pawh hriselna lamah tan lak a ngaih thu - heng vaihlo, zu leh ruihlo lakah insum a tul thu, a bik takin nu naupai lai chuan ei leh inah an fimkhur chuan rualbanlohna lakah engemaw chen kan him thei a ni tih a sawi a. Rualbanlote chu midangte aiin an nep emaw an hniam emaw tia rilru pu tur an ni lova, khawvelah rualbanlo engemawzatin pianphunga mi pangngaite aia thleng thui leh hlawhtlinna sang zawk nei an awm tiin Pu Nirbhay Sharma chuan mihring ngaihtuahna hian thiltihtheihna a keng thui hle a, mahni inrinzawhna leh tumruhna hian hlawhtlinna a hmuh tir fo ang tiin Seminar chhimtute a fuih. Hmarchhak state hrang hrang atanga lo kal rualbanlo mi 150 te tana zirtirna hun tha tak Mizoram-ah a vawi khatna atan buatsaih a ni thei chu lawmawm tiin Larsap chuan duhsakna sang ber a hlan a ni.

RCI Member-Secretary Pu S.K.Srivastava pawhin thu sawiin rampuma rualbanlote tana hamthatna tur ruahmanna a tlem thin hle thu a sawi a, amaherawhchu sorkarin an hmasawnna a ngai pawimawh chho zel a, tunah chuan RCI kaltlangin Persons with Disabilities (PwDs) tan an mamawh ang zel milin programme 16 lai kalpui mek a ni, a ti. Hmarchhak bialah RCI chuan Centre 11 a nei a, Mizoramah Centre bik an neih loh avangin SCERT nen an thawkho thin thu sawiin Pu Srivastava chuan SCERT Director Pi Laldawngliani Chawngthu leh a thawhpuiten an hmalakna hrang hranga an thlawpna chungah lawmthu a sawi bawk.

RCI-NE Zonal Coordination Committee Chairperson Pu L.T.Ricky chuan hmarchhak biala an hmalakna hrang hrang a tarlang a. Rehabilitation Council of India hi kum 1986 khan din tan niin, kum 1995 khan Parliament-in 'Persons with Disabilities (Equal Opportunities, protection of Rights and Full Participation) Act' a pass a, kum 2000 khan rualbanlote mamawh phuhruk lehzual theih nan Amendment siam a ni leh nghe nghe a; hei hian nasa takin rualbanlote tan hamthatna a thlen a ni, a ti a. He Act chuan RCI hnuaia rualbanlote zinga thawk turte chu professional training leh degree neih a phut a, mithiam tak tak loh chu an ruai ngai loh thu a sawi bawk.

Vawiina hawn tak Capacity Building Seminar-ah hian rualbanlote tana nasa taka thawk leh hma la mek leh tawnhriat ngah mi engemawzat ramchhung hmun hrang hrang atangin Resource Persons atan sawm an ni a, heng mithiamte hian zirtirna an rawn pe dawn a ni.

WRITTEN BY MINA ZOLIANI, MIS, PRO TO GOVERNO,  DATED: 4TH OCTOBER 2016, 1:04 PM