Press Release of Governor

GOVERNOR-IN SPICEJET AIZAWL-KOLKATA FLIGHT HMASA BER VAILIAM - 4th October 2016

GOVERNOR-IN SPICEJET AIZAWL-KOLKATA FLIGHT HMASA BER VAILIAM

Aizawl the 4th October 2016: Spicejet Airlines Aizawl-Kolkata flight hmasa ber chu vawiin khan Lengpui Airport atangin Mizoram Governor Lt Gen Nirbhay Sharma-in a vailiam.

SpiceJet thlawhna hmasa ber thlawh chhuah tir lawmna inkhawm Lengpui Airport-a neihah Khuallian Mizoram Governor chuan Mizoram leh ramchhung hmun dangte inpawh theihna tur Spiceject Airlines-in flight service an rawn tan thar thei chu a lawmawm hle a ni, a ti a. Sorkar laipuiin ‘Look East Policy’ a kalpui mekah pawh hetianga state pawn hmunte nena inzawmna leh intlawhpawh theihna tur ruahman belh a ni ta chu Mizo mipuite tan a tangkai hle dawn a. Mizoram atanga hna pawimawha New Delhi zin thin sorkar officials leh midangte chuan connecting flight man an ngaih thin avangin airport-ah nileng hun an hmang thin a; Spicejet ten zing/chawhma lamah flight an ruahman theih chuan zinmite tan awlsamna thui tak a siam theia a rin thu a hrilh bawk.

SpiceJet Airlines-in Mizo mipuite tan flight service thar an ruahman chungah lawmthu sawiin an kal zelna turah duhsakna a hlan. SpiceJet Airlines Sr. Vice-President Pi Shilpa Bhatia pawhin thu sawiin India hmar, thlang leh chhim lamah te SpiceJet chuan network tha tak an neih tawh a, tunah chuan India chhak leh hmarchhak bialh thlawhna service thar an rawn nei thei ta hi an lawm hle a. Vawiin vekah Kolkata atanga Bangkok direct flight thar an tan thu a sawi a, he flight hi ramchhung khawpui lian Delhi, Mumbai, Chennai leh a dangte nen a inthlunzawm vek a, SpiceJect flight hmangin zinmiten Kolkata atangin Bangkok an thlawk chhuak thei tawh dawn a ni tih a sawi.

WRITTEN BY MINA ZOLIANI, MIS, PRO TO GOVERNOR, DATED: 4TH OCTOBER 2016, 4:46 PM