Press Release of Governor

​GOVERNOR LEH LUNGLEI DISTRICT OFFICER-TE INKAWM - 6th April 2016

GOVERNOR LEH LUNGLEI DISTRICT OFFICER-TE INKAWM

Lunglei 6th April 2016: Zan khat riaka Lunglei rawn tlawh Mizoram Governor Lt.Gen.(Rtd) Nirbhay Sharma, PVSM, UYSM, AVSM, VSM chuan vawiin chawhma khan Lunglei Circuit House Conference Hall-ah Lunglei DC Pu Abhijit Vijay Chaudhari, Lunglei SP Pu Zosangliana leh District Heads of Departments te nen inkawmna hun an hmang.

He hunah hian Lunglei District huamchhunga sorkar hmalakna hrang hrang leh hnathawh dante an sawiho.Mizoram Governor Lt.Gen.(Rtd) Nirbhay Sharma chuan sorkarna hmalakna zingah a bik takin Rural Development, Health, Education, Rural Development, UD&PA, PHE, PWD leh Bank te hnathawh chungchang hriat a duh thu sawiin, heng department officials ten Lunglei District huamchhunga anmahni hnuaia sorkar ruahmanna hrang hrang kalpui mek leh hnathawh dante an tarlang a. Governor chuan Lunglei District chhunga department-te hmalakna hrang hrang fakin, Lunglei khawpui pawh fai hlea a hmuh thu a sawi a; a bik takin hriselna leh zirna lamah tanlak lehzual a ngaih thu a sawi bawk. Meeting-a tel ve Assam Rifles, BSF leh Mizoram Police hotute chu thalaite hmakhua ngaia infiamna leh anmahni chherna kawngah sorkar departmet-te leh khawtlang hruaitute nen inpawh taka thawk ho tura a duh thu a hrilh. Lunglei District chhunga Mizo bakah hnam tenau Chakma leh Bru te pawh an awm avangin inunauna leh inpumkhatna rilru pu a, hnam chibing ang zawnga inthliarna awm lova thawkho zel turin a fuih bawk.

Mizoram Governor hian tukin khan Hrangchalkawn-a TNT Home a tlawh a, tanpuina sumfai leh thildang engemawzat a pe a ni. TNT Lunglei Home hi kum 1998 khan Pu Duhkima, Zotlang-in ram a pekah din tan a ni a, tunah hian fahrah, rualbanlo leh ruihlo ngai enkawl lai azavaiin mi 153 an nei a. Mizoram Governor chuan TNT-a thawkte chu khawtlang tana rawngbawlna ropui tak an thawk mek a ni tiin a fak a, an nupain ‘TNT chhungkua’ ah tel anga an inngaih thu leh engtik lai pawhin anmahni tanpui turin an inhawn reng thu a hrilh bawk.

WRITTEN BY MINA ZOLIANI, MIS DIPRO LUNGLEI, DATED: 6TH APRIL 2016