Press Release of Governor

GOVERNOR LEH UD&PA MINISTER INKAWM - 9th March 2016

GOVERNOR LEH UD&PA MINISTER INKAWM

Aizawl 9th March 2016: Vawiin chawhma dar 11:30 AM-ah khan Mizoram Governor Pu Nirbhay Sharma chuan Pu Zodintluanga, Minister, UD&PA chu lengah sawmin Smart City chungchang leh Aizawl hmasawnna tur hrang hrang a sawipui.

UD&PA Minister leh Governor inkawmnaah hian Pu Zodintluanga chuan Central Government atanga Mizoramin project hrang hrang retain a neih thinte chu sanction turin rei tak tak buaipui a ngaih thin avangin duh angin project te thawh vat vat a ni thei thin lo a. Project te sanction thuai a nih theih nan UD&PA Minister chuan Governor chu theihtawp chhuahpui turin a ngen a ni.

Central Flagship Programme Smart City chungchang an sawi dunnaah Governor chuan UD&PA Minister hnenah Raj Bhavan chu Smart Raj Bhavan a nih theihna turin Aizawl Smart City Project-ah telhsak ve turin a ti a, Minister chuan Aizawl Smart City Project-ah Raj Bhavan telh a nih ve theih nan theihtawp chhuah a tiam a, remchang hmasaah UD&PA Officer leh technical personnel ten Governor Office berawnin Smart Raj Bhavan Concept an siam nghal bawk ang. Heng bakah hian Aizawl Master Plan zulzuia khawpui zauh hna pawh kalpui chhoh bek bek a tul thu leh, Sairanga rail head kum 2 kum thum hnua lo thleng mai tur pawh thlirlawka Sairang khua hi town planning mumal tak neih a tul thu an sawi bawk a ni.

Pu Nirbhay Sharma, Governor chuan Aizawl khawpui chu hill station nuam tak mai niin khawpui nuam taka siam theihna remchang tam tak a awm thu sawiin, Mizoram ang bawk a hill station ni ve Sikkim nen pawh tangdunin hill station nuam tak an nihna te sawiin a hranpaa special attention pek tlak hial a nih thu Central Sorkarah thlen a that thu a sawi. A sawi zelnaah Governor chuan Aizawl khawpui chu khawpui dangte ang bawkin urban culture tha tak tak nei thei a ni a, chutih rualin thalaite tana intihhlimna turte leh mipui nawlpuiin hriselna lama hma an sawn theih nan gymnasium thahnem tak a awm awh a tul thu UD&PA Minister a sawipui bawk a ni. Minister chuan, thalaite hmakhua ngaitu Governor Mizoramin a nei chu lawmawm a tih thu sawiin Governor chu thlaite tana hmalakpui zel turin a ngen bawk a ni.

UD&PA Minister Pu Zodintluanga chuan, Mizoram Sorkarin Ministry of DoNER-a project a thehluh tam tak hi retain a nih hnuah pawh sanction mai lovin Ministry of DoNER hian zawhna tam tak siamin chung zawhna chhang chuan hun leh kum tam tak a liam a, project sanction a nih meuh chuan DPR- a hun leh sum ruahman lawk sa a pel duai a, project pawh zawh hleih theih a ni lo fo thin a. Heng hian North East state-te min tibuai hle a ni, a ti. A sawi zelnaah Minister chuan, DoNER Ministry-a sanction neih dan kalphung hi tihtawi leh tihawlsam hi North East State te hian an mamawh thu hrilhin Governor chu Govt. of India-a hma laksak turin a ngen bawk a ni.

WRITTEN BY LALNUNMAWII, MIS IPRO, DATED: 9TH MARCH 2016