Press Release of Governor

Governor Pillai leh BCM puipaten Covid-19 dona kawng thil pawimawh sawiin inkawm - 29th April 2021

Aizawl, the 29th April 2021: Vawiin chawhma khan Governor PS Sreedharan Pillai chuan Baptist Church of Mizoram(BCM) hruaitute Raj Bhavan-ah a kawm a. Hrileng dona kawngah Kohhran hruaitute pawimawhna leh thil pawimawh dang te an sawi a. Naktuk chawhma dar 11-ah hian Health Minister Dr R.Lalthangliana nen MKHC, NGO Coordination Committee leh Ex-Service League hruaitute te an kawm leh dawn a ni.

Governor Pillai chuan BCM hruaitute chu an kohhranmite Covid -19 hrileng lakah an lo himna tura an hmalak dan te zawtin tuna hmalakna tha tak kal mek chu chhunzawm zel turin a chah a. Sawrkar, Kohhranmite leh Tlawmngai pawlte hmalakna avangin Mizoram dinhmun chu India ram hmundang lakah chuan la ziaawm mahse inthlahdah a thiang lo a. Tun hun hi tanlak hun tak leh nasa zawka fimkhurna inzirtirna kalpui hun a ni a ti. Mizoram mipuite chu Pathian tih leh mahni inthununna nei tha tak an nih zia he hrileng dona kawnga sawrkar an thawhpuinaah hian a lang chiang em em a. Hei hi Mizoram himna chhan pawh ni berin a hriat thu a sawi a ni. Governor chuan, “Kan damdawiin te a lian tawk loa, hmanrua te pawh hmun dang angin a awm tha tawk loa, a thawktute te pawh an tam tawk loa. Kan himna ber tur chu lo invent lawk leh kan theih ang chin apiangah theih tawpa fimkhur hi a ni a. Hei hi mipui ten kan hriat chian em em a ngai a ni”, a ti.

BCM hruaitute leh Governor inkawmnaah hian Rev. Dr K.Lalrinthanga, Outgoing President, Rev. Dr V.Laldingliana, President leh Rev Dr R.Lalthanmawia, Executive Secretary, BCM, Aizawl Area te an tel a ni.

Written by: Malsawmsanga, MIS, Deputy Director Dated: 29th Apr 2021