Press Release of Governor

GOVERNOR PS SREEDHARAN PILLAI IN MIZORAM STATE GAMES 2019 CLOSING CEREMONY HMANPUI - 13th December 2019

Mizoram pum huapa infiammite fuankhawmna, constituency 40 te intihsiakna, Mizoram chhunga Infiamna kutpui lianber Mizoram State Games 2019 chu hlawhtling taka neih a nih hnuah vawiin khan a tiak a. Mzoram State Games 2019 kharna hun hi ropui takin Sipai Lammualah vawiin chawhnu khan result puanna leh lawmman semna hunte hmang telin neih a ni a. He hunah hian Governor P.S. Sreedharan Pillai chu khuallian a ni.

Governor P.S. Sreedharan Pillai chuan Mizoram State a pian hnua State pum huap Infiamna Kut lian ber hlawhtling taka huaihawt a ni chu thil chhinchhiah tlak tak a ni a. MLA 40 rual ten phur taka an bial team te an buaipui chu thil danglam tak leh state dang te tan pawka entawn tlak a ni a. Mizoram MLA te an chhuanawm hle a ni a ti.He Infiamnna kutpui hlawhtlin theih na tura tha leh zung thawhtu infiammite, Official te, Mizoram Sawrkar thuneitute leh Mizoram mipui zawng zawng te chu he hlawhtlinna lian takah hian a lawmpui tih a sawi hmasa a. Mizoram chu Infiamna huangah an hmingtha hle tih a lo hriat thu leh a taka a hmu thei chu vannei an intih thu a sawi a ni.

Mizoram infiammite hlawhtlinna chuan Mizoram mai ni lovin India a ti hmingtha a ni a ti a. Tunhnai maiah pawh Mizoram atangin infiammi hlawhtling tak tak an lo chhuak tawh tih a sawi a. “Jeje Lalpekhlua, tuna Indian Super League Player, India Team Captain leh inghahna te, Lalremsiami,Indian Women’s Hockey Team Player, Asian Games 2018 a Silver Medal vawchhuaktu te leh International Hockey Federation pawn Rising Star of The Year zinga a chhawpchhuah te, rit chawi chak Jeremy Lalrinnunga, India ram aiawh a Youth Olympics 2018 a Gold Medal la hmasa ber te hi kan Superstar an ni mai lova India chhuanvawr te an ni a. Ka chhuang takzet a ni”, a ti a. I-League-ah tuma beisei lohin Aizawl FC an rawn champion te kha Mizoram mipui zawng zawng te kan inchhuanna tur a ni a. Tunah hian ISL-ah te Mizo Player tam tham tak an awm mek tih hriat te hian Mizoram thalai te hian Infiamna khawvelah theihna sang ber an nei tih a chiang a ni a ti.

Mizoram Sawrkarin Mizoram State Policy a siam a. Chu chuan rah duhawm tak a chhuah chho mek a. Mizoram State Games 2019 hlawhtling taka siam a han ni leh te hi sports huanga Mizoram hmabak ti engtu Infiammi talent tha tak tak nei inphum ru haichhuahna tangkai tak a ni a ti. Governor chuan Infiamna uar zawk chu khawtlang nun tibuaitu - ruihlo, zuk leh hmuam dona tha tak a nih bakah nundan hrisel lo avanga natna khirh tak tak awm thei te pumpelhna a ni a. Prime Minister in ‘Fit India Movement’ a lo kalpui tawh nen pawh a inmil thlap a. “Sports avangin Mizoram a hmingtha zual zel dawn a. Tuna Medal hlawhchhuaktu thalai rual te pawh hlawhtlinna lian zawk nei turin duhsakna sang ber ka hlan nghal a ni”, a ti.

Chief Minister Pu Zoramthanga pawhin thusawina hun hmangin kum 34 hnu ah Mizoram State Games neih a ni leh thei chu lawmawm a tih thu a sawi a. Mizoramin sports lama India ram leh khawvel huap thlenga lang phak theihna turin State Games chu theih tawp tihhmasawn zel a nih tur thu a sawiin, mipui pawhin hlut theuh turin a sawm a ni.

Mizoram pum huapa infiamna kawnga infiammite tih hmasawnna leh infimmi tha bik, Mizoram aiawh tur te zawn chhuahna atan Mizoram State Games 2019 chu buatsaih a nih thu Sports Minister Pu Robert Romawia Royte chuan a sawi a. He infiamna kutpui, hau tak zet mai hlawhtling taka neih a nih avangin thlawptu mipuite, infiammite leh Official tha leh zung hmangtute zawng zawng chungah lawmthu a sawi a. Mizoram State Games 2019 neih chhungin result duhawm tak tak a awm thu sawiin Imfiammi rawn chhuak zingah kum lama la naupang tak tak imfiamna khawvela hmabak eng tak nei te an rawn penchhuak chu thil lawmawm tak a ni tih a sawi a. Mizoram State Games 2019 neih a nih theihna tura hmalatu Chief Minister Pu Zoramthanga, Mizoram Sawrkar leh Ministry of Tribal Affairs chungah infiammite aiawhin lawm thu a sawi bawk a ni. Pu Robert Romawia Royte chuan Mizoram State Games 2019 result atangin chiang takin Mizo infiammite theihna kan hmu a, Mizoram tan mai ni lo, India ram aiawh a la rawn penchhuak tur engemaw zah an awm a ni a ti. State Games chhungin Talent in phumru tam tak haihchhuah a ni a. Heng infiammite thazual deuh te hi chhinchhiah an ni a, sawrkarin an theihna te peipun a nih theih nan theihtawp a chhuah chhunzawm dawn a. A pawimawh lai ber chu Infiammite tan leh thalaite tan hrim hrim pawh ruihlo laka inthiar fihlim a ni a. “Hrisel a pawimawh a, hriselna tello chuan ramin hma a sawn thei lova, Mizoram hi India ram chhunga state hrisel ber nih kan tum a ni”, a ti.

Mizoram pum huapa infiamna kutpui hi hun hmasa lamah lo neih a ni tawh nain tun tuma mi anga huapzo leh liantham zawk, awmze nei zawka ruahman leh Budget felfai taka siam a la awm lo a ni. Tun tuma State Games buatsaih a nih chhan ber chu infiammite zinga talent nei tha haichhuah, infiammi ti thei zual deuh te khalh fal leh sports tih hmasawn a ni a. Hei vang hian Mizoram State Games pawh hian Sawrkar laipui ngaihven pawh a hlawh hle a ni. State Games neih chhung zawng hian India ram Sports thuneitu sangber, Sports Authority of India(SAI) chuan infiamna hmun hrang hrangah SAI Scout te a duty tir vek a. SAI Scout te hian uluk takin infiammite hi an thlithlai reng a. SAi hotupa ber Pu Sandeep Pradhan, Director General pawh nimin lam khan Aizawl lo thlengin Venue hrang hrang a tlawh kual nghal a ni. Mizoram State Games 2019-ah hian infiammi 7447 an tel a, Sports Discipline 32 a awm a, event 221 a awm a, Inkhelhna hmun(venue) 24 a awm bawk a ni. Team Game, Mimal inelna hrang hrang - athletics, Combat sports, aquatics,etc., te bakah Mizo Infiamna bik( Indigenous Sports) te pawh a State Games-ah hian a awm kim hle a ni. State Games a titha zual, medal la pha chin te tan hian Mizoram aiawha inkhelh kawng a in hawn bakah Sawrkar duhsakna pawh hnalak turah te a neih theih dawn a ni.

Mizoram State Games 2019 kharna inkhawm hi Pu H.Lalengmawia, Secretary, Sport &Youth Services in a kaihruai a. Chief Minister Pu Zoramthanga chuan Mizoram State Games 2019 Souvenir a tlangzarh a. He hunah hian Champion, Runners-up te leh mimal inelna bika Best Athlete(Hmeichhia) leh Best Athlete(Mipa) te hnenah lawmman hlan a ni. Mizoram State Games 2019 a MLA Constituency 40 intihsiakte zingah 25 Gold, 18 Silver, 16 Bronze Medal Medal la tu Aizawl East - I Constituency Contingent te chu Champion-ah puan an ni a. Anni hian Mizoram State Games 2019 Champion Nomawi chu an chawi ta a ni. Aizawl West - I Constituency Contingent, 21 Gold, 10 Silver leh 18 Bronze Medal latu chu First Runners-up ah puan an nia, Aizawl East- II Constituency Contingent 17 Gold, 11 Silver leh 23 Bronze Medal latu chu Second Runners-up an ni thung a ni. Mimal inelna bikah 3 Gold leh 1 Silver Medal latu chu Nl. Elisian Madai, Lunglei East chu Best Athlete(Hmeichhia) ah puan a ni a 5 Gold Medal latu Pu. Lalsangliana, Aizawl South - I chu Best Athlete(Mipa) ah a ni thung a ni. State Games 2019 Closing programme-ah hian Deputy Chief Minister Pu Tawnluia, Minister te, MLA te leh Infiammite an tel a. Mipui an pungkhawm tha hle a ni.

Written by: Malsawmsanga, MIS, PRO to Governor  Dated: 13th Dec 2019