Press Release of Governor

GOVERNOR P.S. SREEDHARAN PILLAI IN MIZORAM STATE REPORT PRESIDENT LEH PRIME MINISTER TE HMAAH PE - 24th November 2019

Vawiin khan Rashtrapati Bhavan-ah 50th Conference of Governors chu khar a ni a. He hunah hian President Ram Nath Kovind, Vice President M. Venkaiah Naidu, Prime Minister Narendra Modi leh Union Home Minister Amit Shah leh Ministry hrang hranga Secretary rual te an tel a. He hunah hian Pu P.S. Sreedharan Pillai, Governor of Mizoram chuan Mizoram Sawrkar dinhmun, hmalakna leh hmachhawp te sawina hun a hmang a ni.

Governor P.S. Sreedharan Pillai chuan India ram mi pawimawh ber ber te hmaah Mizoram pawimawhna leh ngaihven a tul na chhan te chiang takin a sawi a. Mizoram chu state lian lo tak, a chhunga mi cheng te pawh nuai 12 chuang awrh ni mawh se, theihna sang tak nei a ni a ti. International ramri thui tak Myanmar leh Bangladesh a tawmpui avangin India tan Asia khaw mualpui lam hawia kawtchhuah pawimawh tak a ni thei a. Lawng hmanga India hmarchhak leh India mainland inkalpawhna kawtchhuah a ni thei bawk a. Chuvangin Mizoram awmna hmun India in a chhawr tangkai dawn chuan Act East Policy of India hi vung zawka kalpui a ngai dawn a ni a ti.

Good Governance huangah Mizoram chuan chhuanawm takin hma a la mek tih a sawi a. Aizawl khawpui chu Plastic Free City niturin kumin October 2 atang khan Aizawl Municipal Corporation in Bye-Laws a siam zuin kutthlak tan a ni a. Aizawl khawpuia lirthei tawt lutuk tih ziaawm nan Parking House Support Scheme(PAHOSS) pawh Parking Lot siamtute tanpuina sum pe chhuak turin kalpui mek a ni a ti. NITI Aayog zirchiannaah Mizoram chu state te zingah Health Outcomes Index a sang ber a ni a. India hmarchhakah SAUBHAGYA (Pradhan Mantri Sahaj Bijli Har Ghar Yojana) hlawhtling taka kalpui thei hmasa ber a ni bawk a ni a ti. Mizoram chu inthiarna hmun lova daikal/inthiar awm tawh lohna state a nih bakah faina kawnga nasa taka hmala mek a ni tih a sawi a. Mizoramah census town 23 lek awm mahse heng zinga khua 3 hian National level a hnathawk tha, ‘Swachh Suveshan’ award an la thei hi an chhuanawm hle a. Abik takin faina kawnga hmalak that vanga Nation Award dawngtu Pi Laltharzeli, Mamit District a chhuanawm hle a. A ni hian Children Sanitation Club 85 lai a din a ni a ti.

Mizoram chhunga Mau te hi sum tam tak siam theihna tur hmanrua, ‘untapped potential’ a ni a. Mau hman tangkai kawngah hian Central Sawrkar pawhin sum leh thiamna hmanga State a rawn pui a tul hle a ni a ti. Healthcare huangah pawh entawn tlak khawpin Mizoramin hma a la mek a. Centre Sawrkar hmalakna Ayushman Bharat-Pradhan Mantri Jan Arogya Yojana (AB-PMJAY) mai duh tawk lovin Mizoram sawrkar chuan mipui hrisel zawk nan Mizoram State Health Care Scheme (MSHCS) a kalpui tel a. Mizoram MLA te hian anmahni hlawh 1% chu MSHCS premium atan thlatin an thawh a, an chhuanawm hle a ni a ti. Hnathawktute thawhrimna avangin IMR leh MMR te a rawn tla hniam a, a lawmawm hle a. Hetih lai hian MIzoramah Damdawi In tha a tlem a, tunlai damlo enkawlna khawl tha zawk te a awm lo va. Hemi kawngah hian Central sawrkar pawhin a hma alak a tul hle a. Damlo enna khawl pawimawh tak Pet Scan Machine leh MRI te phei chu pakhatmah a la awm lo hi thil veiawm tak a ni a ti a. AIIMS anga Institution tha, super speciality Hospital awmna pakhat tal chu Mizoram hian a mamawh tawh a ni ati.

Kawng leh Digital Connectivity hrim hrimah Mizoram dinhmun a la hniam hle a. Connectivity thilah hian Central sawrkar pawhin Mizoram chu a ngaihven zual bik ngai zinga mi kan ni a ti a. State la naupang tak a nih avangin Central sawrkar atanga tanpuina hi a mamawh lo thei lo a ni a ti.

Written by: Malsawmsanga, MIS, PRO to Governor Dated: 24th Nov 2019