Press Release of Governor

​GOVERNORIN IN PADMASHREE AWARD DAWNGTU PU C.KAMLOVA HINDI A THUZIAKMI LAWMPUI - 3rd February 2020

Vawiin chawhnu khan Governor P.S. Sreedharan Pillai chuan kumin Republic Day a Padmashree Award dawngtu Pu C. Kamlova, Salem Veng, Mualpui Tlang, Aizawl a cheng mek, Hindi tawnga thuziaktu leh Mizorama Hindi tawng zirna kawnga thawh hlawk tak chu Raj Bhavan-ah lenglutah sawmin thingpui ruai nen a hlawhtlinna a lo lawmpui a. Lawmpuina thuziak bakah tangkafai a pe tel bawk a ni.

Padmashree Award hi India khua leh tui michhuanawm leh hnathawktha chungchuangte chawimawina sangber zinga mi a ni a, Bharat Ratna leh Padma Vibhushan leh Padma Bhushan tih lohah chuan ngaihhlut ber a ni a. Kumin hian Pu C.Kamlova, Hindi tawnga Thuziakmi chuan he lawman hi Pu Ramnath Kovind, President of India hnen atangin a dawng dawn a ni.

Governor P.S. Sreedhara Pillai chuan India ram mipui Vaibelchhe 134 zingah Mizoram mi pahnih India rama vantlang inchawimawina sang ber pali dawngthei kan ni hi thil ropui tak a ni a, a chhuanawm em em a ni a ti a. Pu C.Kamlova chu hunrei tak chhung Mizo ten India rama tawng tlanglawn ber Hindi an thiam theihna tur hmalatu a ni a ti a. Governor chuan khawi hmunah pawh mahni pianpui tawng(mother Tongue) a pawimawh ber a, India ram bikah chuan National language – Hindi hi a pawimawh chho zel si a; mipui ten thiam kan tum zel pawh a ngai a ni a ti. Pu C.Kamlova chu a hnathawh that te Rastrapati Bhavan in an lo hriat saka an chawimawi chu thinlung takin a lawm pui tih a sawi a. A hawlhtinna chu Mizo mipui zawng zawngte hlawhtlinna leh hmingthatna ni a ti a. Padmashree chawimawina dawng phak hi India ram state dangah te an ngai hlu hle a; hetiang lawman dawngphak michhuanawm tak tak Mizo ten kan nei hi inchhuanna chang kan hriat a, a dawngtute ngaihsanna chang pawh kan hriattel a a ngai a ni a ti. Pu C.Kamlova rawngbawlnaah hian Hnam inpumkhatna atana tangkai tak Hindi zirtirna chu Mizoramah a hlawhtling chho tan mek tih a sawi a. Pu C.Kamlova chu a thuziak te chhunzawm zel tur leh Hindi tawnga Mizo Literature pawimawh te dah kawngah theihtawp chhuah chhunzawm turin a chah a ni.

Pu C.Kamlova, Padmashree Awardee pawhin a lawmman dawn chungchangah a hmasa berin Pathian leh mipuite hnenah lawmthu a sawi a. A suangtuah ngai miah loh chawimawina a dawn avang leh a beisei ngai loh Governor lawmpuina leh duhsakna Raj Bhavanah a dawng chu thinlung takin a lawm a ni a ti. A theih ang tawka Hindi Literature huanga Mizo te tan hmahruaitu zingah a tel thei chu vannei a in tih thu a sawi a. Hindi tawng hmanga hnam inpumkhatna kawngah a theih anga hma lak chhunzawm zel a tum thu a sawi a. Pu C.Kamlova hian Governor hnenah a lehkhabu ziak 4 leh a hlaphuah 2 a pe nghal bawk a ni.

Pu C.Kamlova hi kum 1948, November 17 khan Mampui khua, Lawngtlai District- ah nupa tuak, Pu C.Hluanchema a leh Pi J.Kilhliangi te inkarah a lo piang a. Amah hi pa tumruh tak niin hmanlai pawlruk a passed hnuah Sipaiah a tang a. Sipai hna a thawh zawh hnuah Private a inzir tha lehin Class vawi khatmah chhim lo leh hnathawk chungin Matric atanga M.A.(Hindi), M.Ed(Hindi) a zirchhuak vek a. M.A. leh M.Ed hi a ruala Exam in M.Ed-ah phei chuan a tithaber a ni. Eizawnna lamah Hindi Zirtirtu hna a thawk thin a. Thuziak lama tuimi a ni a, Mizotawnga Thu leh Hla te Hindi a dah kawngah te thawh hlawk tak a ni a. Kum 1995 khan MBSE in mawhphurhna a pek angin Class VI Zirlaibu “ Zoram Bharti” a siam a. Kum 2000 khan thumal 29,000 chuang awmna Hindi-Mizo Dictionary chu kum 4 chhung a buaipui hnuiin a chhuchhuak a. He Dictionary hi Ministry of Human Resource Development chuan tha tih em avangin a siamtu Pu C.Kamlova hnenah hian Rs 1,00,000/- kengtel chawimawina, National Honor Award a hlan a ni.

Pu C.Kamlova hnuhmate a hnuaiah hian tarlan a ni.

1. Kum 1999-2000 bawr khan Scheduled Tribe zirlai ten Post Matric Scholarship an dawn thin chu Hindi tawng zirlai ten an dawn ve theih nan a lo sual chhuah sak ve tawh a ni.

2. 1999-2000 bawr vel tho khan Hindi Praveen ( Hindi B.A) course hi recognize a nih ve theih nan a bei thin a. A hlawhtlinna pawh hmu in Mizoram Hindi Prachar Sabha hnuaia Hindi B.A course chu Mizoram leh Central sawrkarin an recognize tawh a ni.

3. Mizo thalai Hindi zir duh ten hmun hma nghet an neih ve theih nan theihtawp a chhuah thin a. Kum 2011 khan Mizoram Hindi Prachar Sabha chuan New Capital Complex ah hmunhma an nei ve thei ta a. A building construction pawh hi ama ho hian bul an tan ngei a ni.

4. Hindi zirlai ten excursion trip allowance an neih ve theih tak pawh hi hun rei tak a lo sual sak tawh rah a ni kan ti thei ang.

CHAWIMAWINA A DAWN LANGSAR ZUAL TE:-

1. 2016: Surya Sansthan, Noida in ‘Hindi- Mizo Dictionary’ changtlung tak a siam avangin Award an hlan.

2. 2017: Summallan Samman (Award) chu Hindi Sahitya Summallan, Allahabad in an hlan. Hei hi Mizo ten Hindi an thiam ve theih nana a hmalakna chhuanawm an tih avanga hlan an ni.

3. 1997: YMA Bawngkawn Branch in Teacher’s award an hlan.

4. 2010: Salem Veng Branch YMA in ‘Chawimawina’ an hlan.

5. 2006: Young Gorkha Association leh Mizoram Gorkha Women Association in Nepali literature-a a thawh hlawk em avangin chawimawina an hlan.

6. 2007: Zonet Cable TV chuan Zofate zinga mahni tawng ni lo, tawng dang hmanga literature filed-a a contribution nasa tak avanga Mizo te a tih hming that avangin Zonet Award an hlan.

7. 2010: Universal Hindi Communication in an buatsaih ‘Most Outstanding Lifetime Achievement award’ chu Raj Bhavan Durbar Hall, Aizawlah hlan a ni.

8. National Award “Bhasha Bharti Award 2003-04” chu Mysore ah Central Institute of Indian Languages in an hlan. Hetah hi chuan Nepali literature-ah hlan a ni. A lehkhabu ziah, “Anubhav ki Duiphant” tih hmangin.

9. Ministry of Human Resource Development, Govt. of India chuan “Rashtrya Samman (Award) 2004-05” chu “Hindi- Mizo Dictionary” changtlung tak a siam avangin an hlan.

MAWHPHURHNA A CHELH HRANG HRANG ZINGA A LANGSAR ZUAL TE:-

1978-79 : President, Lunglei District Hindi Teachers’ Association, Mizoram

1999-2000 : President, All Mizoram Hindi Teacher’s Association

2000-2001 : Chairman, Academic Committee, Mizoram Hindi Prachar Sabha

2004-2005 : Chairman, Mizoram Hindi Examination Board

2004 : Chief Editor, Mizoram Hindi Prachar Sabha Jubilee Souvenir

1997-2008 : Principal, Rashtrya Bhasha Mahavidyalay.

2002-2007 : Expert in the committee for selection of Hindi Teachers in Mizoram

MIZO TEN HINDI TAWNG KAN LO THIAM VE THEIH NAN TE LEH MIZO HNAM HI INDIA HIAN MIN HRECHIANG VE SE A TIH AVANGIN LEHKHABU CHI HRANG HRANG A ZIAH BAKAH LEHLIN HNA PAWH A THAWK NUAL A. CHUNG ZINGA A LANGSAR ZUALTE CHU-

1. 1990’s ah “ Hum ek the, hum ek hai” leh “ Vande Mataram” (National Song nen ngaih pawlh loh tur, hlathar) tih hlate chu Hindi in a phuah.

2. 2006: Prof. Laltluangliana Khiangte ziah “Khuangchera” chu Hindi tawngin a letling.

3. 2006: “ Lalnu Ropuiliani” tih bu Prof. Laltluangliana Khiangte ziah chu Hindi in a letling.

4. Heng te hi Mizo tawngin a dah-

a) Pariksha by Prem Chand ( 2007)

b) Do Baanke and Ekangki (2009)

Written by: Malsawmsanga, MIS, PRO to Governor     Dated: 3rd Feb 2020