Press Release of Governor

​GOVERNORIN IN PADMASHREE AWARD DAWNGTU PU LALBIAKTHANGA PACHUAU LAWMPUI - 1st February 2020

Vawiin chawhnu khan Governor P.S. Sreedharan Pillai chuan kumin Republic Day a Padmashree Award dawngtu Pu Lalbiakthanga Pachuau, Prominent Journalist chu Raj Bhavan-ah lenglutah sawmin thingpui ruai nen a hlawhtlinna a lo lawmpui a. Lawmpuina thuziak bakah tangkafai a pe tel bawk a ni.

Padmashree Award hi India khua leh tui michhuanawm leh hnathawktha chungchuangte chawimawina sangber zinga mi a ni a, Bharat Ratna leh Padma Vibhushan leh Padma Bhushan tih lohah chuan ngaihhlut ber a ni a. Kumin hian Pu Lalbiakthanga Pachuau, Prominent Journalist chuan he lawman hi Pu Ramnath Kovind, President of India hnen atangin a dawng dawn a ni.

Governor P.S. Sreedhara Pillai chuan India ram mipui Vaibelchhe 134 zingah Mizoram mi pahnih India rama vantlang inchawimawina sang ber pali dawngthei kan ni hi thil ropui tak a ni a, a chhuanawm em em a ni a ti a. Pu Labiakthanga Pachuau chu hunrei tak mipui rawngbawla theih tawp chhuah thintu a ni a. A hnathawh that te Rastrapati Bhavan in an lo hria an chawimawi chu thinlung takin a lawm pui tih a sawi a. Pu Lalbiakthanga Pachuau nun atang hian keini khua leh tui te pawhin entawn tur kan nei a ni a ti. Pu Labiakthanga Pachuau rawngbawlna chu state mipui leh India mipui tan a ni mai lova Democracy tan rawngbawlna ropui tak a ni a ti a. A hnathawh that hi Mizoram mipui keh a thawhpui Chanchinbumite zawng zawng tan inchhuanna tham a ni a ti.

Pu Labiakthanga Pachuau, Padmashree Awardee pawhin a lawmman dawn chungchangah a hmasa berin Pathian leh mipuite hnenah lawmthu a sawi a. A suangtuah ngai miah loh chawimawina a dawn avang leh a beisei ngai loh Governor lawmpuina leh duhsakna Raj Bhavanah a dawng chu thinlung takin a lawm a ni a ti. He chawimawina a dawn theihnaah hian a thawhpui chanchinbumite zawngzawng phungbawmna leh kaihruainaah lawmthu a sawi a. Tin, a thawhpui tho Association of Voluntary Blood Donation(AVBD), Mizoram leh Mizoram Social Defence Council te pawhin theihtawpin an vawrh sang a, chawimawina sang tak a dawn theih phahnaah pawh an phungbawmna a tel a ni a ti.

Pu Lalbiakthanga Pachuau hi kum 1927, March 25 khan Saichal khuaah nupa tuak, Pu Satkunga(L) leh Pi Dokungi(L) te inkarah a lo piang a. Amah hi World War II veteran niin Sipai huaisen chawimawina Indopui Pahnihna Tangkapui(World War II Medal), Burma Star, Independence Medal, J&K Medal, Sainya Seva Medal leh a hnathawh that avanga chawimawina dangte pawh dawng a ni.

Pu Lalbiakthanga Pachuau hi ram hmasawnna atan leh mipui vantlang rawngbawlna atana a hun pumhlum hmangtu a ni a. Hlawhtlinna tam takah a bul tantu, sulsutu leh hmahruaitu a nih bakah vangtlang rawngbawltu tlawmngai pawl hrang hrangah nihna nei tawh leh nei mek a ni. Tunhnai maia nihna a chelh mek leh a chelh tawh te : President, Association for Voluntary Blood Donation, Mizoram (2010 to 2014), President, 2nd World War Veteran Association leh President, Mizoram Social Defence Union.

Kawng tam takah mipui tan rawngbawlna a nei a. A bik takin Athlawna Thisen Pek intihhmuh Mizoramah a lo nih theine kawnga bul tantu leh thawhhlawkber zinga mi a ni a; Cooperative Movement a hmahruaitu leh Mizoram Co-operative Society a President hmasa ber a ni bawk a ni. Pu Lalbiakthanga Pachuau hi Active Journalist kum 1980 atang khan tun thlengin a la ni a; Editor, Mizoram Tlangau hna kum 30 a thawk tawh a. Journalism tan a thawhhlawk em avangin kum 2011 April thla khan Mizoram Journalist Association(MJA) chuan chawimawiin “Prominet Journalist” nihna an pe a ni. Pu Lalbiakthanga Pachuau hmalakna leh thawhrimna zarah United Commercial Bank Ltd leh National Insurance Co.Ltd te hi din a lo ni a. Hneh taka a kaihhruaina hnuaiah Mizorama Voluntary Blood Donation pawhin hlawhtlinna a rawn chang a; President, AVBD a nih hun chhung kum 2011 khan kum 2001 kuma voluntary blood donation 22.47 % chu 91% a rawn chho thei a ni. Pu Lalbiakthanga Pachuau hi ruihlo leh sualna hrang hrang laka khawtlang venhimna kawngah te leh Hmeichhe Naupang khuaikhem tawkte humhim leh nun kaihruaina kawngah te mi inhmang leh hruaitu chan chang thin a ni a. Amah hi pa khawhawizau, khawvel ram hrang hrangte pawh tlawh tawh a ni a. USA, UK, Denmark, Jordan, Netherlands, Israel, Egypt, Germany leh UAE te pawh a lo tlawh tawh a ni.

Written by: Malsawmsanga, MIS, PRO to Governor           Dated: 1st Feb 2020