Press Release of Governor

​KRISMAS LEH KUMTHAR PUALA GOVERNOR P.S. SREEDHARAN PILLAI THUCHAH

CHIBAI!

Mizoram mipui duhtakte, Krismas leh Kumthar hunlawmawm takah hian keini nupa chuan duhsakna sangber kan hlan hmasa che u. In hriat theuh angin thla 2 liamtaah mai khan Mizoram Governor hna ka rawn chelh tan a. Mahse, he hun reilote chhung hian Mizoram mipuite duhsakna, ngaihsakna leh thlawpna nasa takin kan dawng tih ka hmuh hian thinlung takin lawmthu in chungah ka sawi nghal bawk a. Mizoram mipuite hi in ngaihnatawm ka ti a, in rilru a zauin in zinga chen pawh nuam kan ti takzet a ni.

Krismas hun hi hlimna,remna, lawmna, induhsaktawnna leh midangte tana luanchhuahna hun a ni a. He hunah hian Lal Isua thuchah ropui tak- hmangaihna, lainatna leh inremna a ni tih kan thinlungah lo thar leh rawh se! Ka naupan lai chuan Martar Thoma Missionary School-ah lehkha ka zir thina, Krismas te pawh hlimawm takin ka hmang ve thin a ni. Isua Krista kha Pathian Fapa ni mahse Lal Inah a piang lova tlawm takin Ranthlengah a lo pianga. Hei hian entirna pawimawh tak khawvel tan a rawn buatsaih tan a. Isua pianna hian tlawmna te,midangte hmangaihna, midangte duhsakna leh Pathian tana rinawmna min hriattirin min zirtir a ni. Chuvangin he hunah hian Mizoram dung leh vanga ka unaute zawng zawng te chu midangte, a bikin miharsa zawk te ngaihsakna leh duhsakna kawngah kan thinlung te lo hawng leh theuh turin ka ngen a. Krismas hunlawmawmah hian tanpui ngaite, kan thenawmte,kan u leh naute leh kan mihringpuite zawng zawng chungah khawngaihna, duhsakna, lainatna leh hmangaihna lantir hi kan thupui ber lo ni se a lawmawm hle ang.

Kan hriattlan theuh angin kan ram ropui takah hian kan nunphung in ang tlang vek lo mahse phel hran theih loh khawpa nghetin pumkhat kan ni a. Khawvela ram ropui tak kan nih angin a chhunga che te hi sakhaw rinna chungchangah kan indawh thei tawnin leh kan inzahtawn em em a ni. Remchanna insiamsak tawnin khawi hmunah pawh kan sakhaw thurin te inthlahrunna awm miah lovin kan auchhuahpui thei a. Hetih rual hian ngaihtuahna fing leh rawtna tha zawk te chu khawi hmun atanga lo kal pawh ni se thinlung inhawng takin kan dawngsawng thin a ni. He mi kawngah hian Kristian Missionary te pawhin Zirna tha tak tak buatsaih te, chanhai chhawmdawl leh tanpui ngai tanpui kawngah te hna an thawk nasa hle a. Kei ngei pawh he duhsakna dawngtu zinga mi ka ni. Sawi tawh angin hmangaihna leh induhsaktawnna hi Lal Isua zirtirna ropui ber tih hre thar leh i la ka duh a ni.

India ram pawhinni telin hma a sawn zel a, remna leh muanna nen ke kan pen zel dawn a ni. Kan hriatreng tur chu kan ram Danpui thuhmahruai-Preamble-ah khan 'Keini mipui' tih dah pawimawh ber a ni a. A awmziaah chuan India ram chhunga chengte hi inangkhat kan ni a, India Ram Danpui angin India khua leh tui te chu rinna avang emaw, sakhuana avang emaw, tawng hran vang emaw, chenna hmun avang leh thil dang avangin thliar hran kan ni lova intluktlang kan ni. Pu Gandhi, Hnam Pa khan Pathian chu 'Thutak' a ni a lo ti tawh a. Thutak hmu turin kan dam chhung hun kan hmang thin a ni. Chutiang bawkin Lal Isua, Pathian Fapa khan Pathian chu 'Hmangaihna' a ni a lo ti a. Midangte pawhin 'Karma' ngai pawimawhin damlaia thil tih thatin nakin hunah awmzia a nei tih an ring ve bawk a ni. Pathian kan zawn dan inang vek lo mahse Pathian chu Pakhat a ni a; Pathian chu thutak leh hmangaihna a ni. Engpawh ni se, he hun lawmawm takah hian ka thuchah pawimawh ber chu 'hmangaihna, lainatna leh inremna' Lal Isua thuchah ropui tak te kha a taka kan nunpui a, Mizoram tan mai ni lo, India leh khawvel pumah te remna leh muanna a lo awm theihna tura kan tih tur theuh te kan tih hi a ni a. Kumthar lo kal tur pawh phurna leh beiseina thar nen lo hmuak leh ila. Kan nghahfa kumthar lo thleng tur hian Mizoram leh India tan hlawhtlinna leh malsawmna tam tak lo herchhuahpui se tih hi ka tawngtaina a ni. A tawp berah chuan Mizoram Mipuite zawng zawng Krismas leh Kumthar hlim leh lawm taka hmang turin kei leh ka nupui chuan duhsakna sangber kan hlan nawn leh a che u. Merry Christmas and Happy New Year.

Ka lawm e.
Jai Hind.