Press Release of Governor

MESSAGE OF HON'BLE GOVERNOR KUMMANAM RAJASEKHARAN ON THE OCASSION OF REPUCLIC DAY 2019

Chibai,

India ram ropui takin Republic Day champha vawi 70-na a lawmna Ni pawimawh takah hian helai hmuna lo pungkhawmte leh Zoram dung leh vanga khua leh tuite zawng zawngte lawmpuina chibai ka buk a che u.

Kum 70 lai liamta, Vawiin Ni angah khan he Ram ropuitak lo dintu, kan hruaitu hmasate chuan India ram Danpui min lo pe a. Chu chuan khua leh tui te hnenah zalenna leh dikna chanvo inangkhat min min pe a ni.

Kum 70 liamta chhung khan India chu khawvel ram zinga mipui thuneihna ram ropui ber zingah a indin nghet tawh a. Hnam hrang tam tak, mize inanglo tak tak leh sakhaw hran hran betute awmkhawm kan ni chungin inlungrual takin kan cheng zaa; kan inpumkhatna hi kan chakna a ni tih alang chiang em em a ni.

Kan sawrkar chuan Mizoram hmasawn nan theihtawp a chhuah dawn a, hmasawnna ruhrel nghet tak siamin state hausa, mahni kutkea ding thei leh intodelh nih kan tum a ni.

Sawrkar langtlang leh rinngam ni turin thil tul apiang tih zel a ni dawn a. Sawrkar inrelbawlna kawngah thuneihna sem zai tur leh Lok Ayukta te ataka kalpui turin ke kan pen chho tan mek a ni.

Kan sawrkar chuan Mizoram tana nunna hlantu Martarte a hre reng a. Chuvangin, Martar chhungkua zawng zawngte chawikan, tihhmasawn leh tanpui chu a lo in tiam tawh angin tihpuitlin a tum dawn a ni.

Kan sawrkar chuan hmasawnna huapzo leh ngelnghet, a chhunga mipuite dinhmun ti hmasawn tur leh ei leh bar kawnga kan intodelhna turin Socio - Economic Development Policy(SEDP) kan kalpui dawn a. SEDP hi a thlawna sum sem a ni lova, project belhchian dawl leh eizawnna rintlak ruahhmantute tana sawrkar chhawmdawlna a ni thung dawn a ni.

Theihtawp chhuahin kan state thawhchhuah punna hi chhawm chhoh zel kan tum a ni. Kawng tinrengah tan kan la dawn a. Heng kan thil tum te tihlawhtling tur hian sawrkar hmasa hun chhunga hmalakna tam tak te pawh zirchiang zelin kalpui zel atana tlak apiang te chu kan chhunzawm dawn a ni.

Kan state ramri te venghim tur hian a tul a piang kan tih zel dawn a. Tin, Mizoram Village Level Citizen Registration chungchang pawh kan a tul anga ngaihtuah a ni dawn a ni.

Kan sawrkar chuan thingtlang mipui nawlpui eizawnna ber Agriculture pawimawh zia a hmu chiang hle a. He sector pawimawh tak huangah hian tunlai thiamna sang ber ber leh thlai thar hlawk dan te pawh kalpui tum a ni.

Organic Farming phei chu uar taka kalpui a ni dawn a. Horticulture, fisheries, veterinary and animal husbandry leh sericulture-ah te nasa takin hna kan thawk dawn a. Hengah te hian a hlawkna thawhchhuah tumin kut kan thlak nasa deuh bik dawn a ni.

Hmasawnna ruhrel changtlung neih hi ram hmasawnna tehfung pawimawh tak a ni a. Keini State tlangram chhengche takah phei chuan kalkawng tha nei tura hmalakna hi hna hautak a tling tih kan hre tlang vek awm e. Heti chung hian ka sawrkar chuan state chhung inkalpawhna kawngpui tha nei tur leh state thenawm te nen kan inkalpawhna tura kawngpui tha nei tur te in theihtawp chhuah a tum a, a tul a piang chu a ti zel dawn a ni.

Kan sawrkar thiltum pawimawh tak pakhat chu mi zawng zawng banphak a damdawi inenkawlna thazawk te chhawpchhuah a ni a. Bul kan tan nghal daw a. Tun hnaiah khan Thisen mamawhtu ten Thisen sawngbawlna man an chawi thin pawh kan tihtawp nghal a ni.

The Mizoram State Health Care Scheme pawh kan ennawn anga, siamthat ngai lai te siamtha in kan kalpui leh dawn a ni.

Kan Sawrkar ngaihpawihmawh dang pakhat chu Zirna chungchang a ni a. Zirna hniam ber atanga a sang ber thlengin tihhmasawn kan tum dawn a ni. Tun mai a kan hmalakna tur chu kan khawtlang nun leh khawsak dan phung milin Sikul Calendar leh Sikul Kai hunte kan herrem dawn a ni.

Aizawl khawpui chhung tawt lutuk hi a ngaihmawh awm takzet a. Kan sawrkar chuan kawngpui siamthat dan tur ngaihtuah in zirchianna pawh a nei chho mek a. Chief Minister hovin mithiamte nen kawngpui survey thawhkhatna phei chu neih a ni tawh a ni.

Kan sawrkar chuan Mizo nihphung, ziarang leh kan Mizo Hnam thil te thlenga vawn that, chawilar bakah pholan te a dah pawimawh bik a ni. Tin, khawvel hmun hrang hranga awm Mizote inunauna leh pumkhatna atan kan sawrkar chuan India danpui milin a tihtur te a tizel dawn a ni.

Infiamna huangah pawh chak takin hma kan la chhunzawm zel dawn a. Olympic kalphung leh inrelbawl dan te behchhan in Sports Policy thar pawh siam thuai kan tum a. He policy hnuaiah hian Infiamna hmunhma te tha zawk sak belh a nih mai bakah Infiammi te pawh lawmpuina sum tam zawk pek thin tum a ni.

Khawtlang mipui te nen thawkho in theihtawp chhuahin Zu leh Ruihlo kan do zel dawn a. The Mizoram Liquor (Control & Prohibition) Act, 2014 pawh thiah a nih theih nan a tul ang angte tih a ni ang.

Tunah hian, Zoram mipui zawng zawng te in theih tawpa sawrkar thawhpui leh thlawp zel turin ka sawm vek che u a. Mizoram hi India ram chhunga state hmasawn bera siam tur chuan Zoram mipuite kan pawimawh ber awm e. Chuvangin kan state hmasawnna turah hian mi mal tin te hi kan pawimawh dan a inangtlang vek a ni.

A tawpberah chuan khua leh tui chhuanawm tak kan nih angin kan ram Danpui a inziak thu pawimawh tak tak - khua leh tui mawhphurhna zawng zawng leh a dang te kha kan chanvo leh mawhah la thar leh theuh turin kan in chahnawn leh a ni e.

MIZORAM MIPUI ZAWNG ZAWNGTE, REPUBLIC DAY HLIM TAKA HMANG TURIN DUHSAKNA KA HLAN A CHE U!

Zoram Mipui zawng zawngte Republic Day pualin duhsakna sangber ka hlan vek che u!

KA LAWM E

Jai Hind!