Press Release of Governor

​MIZORAM BHARAT SCOUTS & GUIDES PATRON ATAN LARSAP LA LUT - 28th February 2019

Aizawl, 28th Feb, 2019 : Vawiin chawhma khan Mizoram Bharat Scouts & Guides Patron atan Larsap Kummanam Rajasekharan, D.Litt(Hon) chu Raj Bhavan Banquet Hall-ah thutiam chham tira lakluh a ni.

Patron thar thuchah sawiin Larsap Kummanam Rajasekharan chuan Scouts & Guides chu mi puitling, khua leh tui rintlak ni tura naupangte inzirna tha ber pakhat a ni a ti. Governor chuan Sikul a kallai chuan amah ngei pawh Scout a nih thin thu te leh Scout Captain te pawh a lo nih tawh thu a sawi a. A hun tawn chhoh zel naah pawh S&G huanga a thil zirchhuah te chuan nasa takin a pui thu a sawi a. Mizoram State Bharat Scouts & Guides 5000 chuangte chu tha taka kaihhruai an nih phawt chuan Mizoram hmelhmang ti danglam turin theihna an nei a ni a ti.

Scouts & Guides thupui, "Inring renga awm tur", tih chu ramri hrula chengte tan ngat phei chuan thil dik a ni a ti a. Mizoram chu a awmna hmun te'n a zir miau avangin a lo inralrin bik a ngai a; eng thil thil pawh lo thleng se a chhungte cheng te chu an lo inpeih sa diam a ngai a. Chuvangin zirlai tam zawk te Scouts & Guides-ah tel thei se a tha hle dawn a ni a ti. Govenor chuan tunlai naupang te chuan mahni chiah ingaihtuahna chang a hria niin a lang a. Hei hi thlak danglam a ngai a; midang te tana thiltha tih hlutna te leh vantlang tana tam zawka penchhuah pawimawhna te thlengin Scouts & Guides inzirtirna huang atang te hian kan zirtir nasat a ngai tawh a ni a ti.

Mizoram Bharat Scouts & Guides(MBSG) Patron atan a Governor lakluh inkhawm hi Pu Zothanmawia, State Chief Commissioner, MBSG, Director, Sports & Youth Services ni bawk chuan a kaihruai a. He hunah hian Governor chu S&G thutiam chham tirin Patron atan lakluh a ni a. Patron lakluhna inkhawmah hian Secretary to Governor Pu K. Lalthawmmawia, State Commissioner, Scouts, Pi K. Lalliantluangi, State Commissioner, Guides leh MBSG hotu dangte an tel a ni.

MBSG hi Rev. F.J.Raper-a’n kum 1932 khan Serkawn, Lunglei-ah a din a; tun dinhmunah scouts & guides 5000 chuang an awm mek a ni.

Written by: Malsawmsanga, MIS, PRO to Governor Dated: 28th Feb 2019