Press Release of Governor

​​MIZORAM GOVERNOR IN KOLASIB DISTRICT HOSPITAL TLAWH - 2nd February 2020

Vawiin chawhnu khan Mizoram Governor PS Sreedharan Pillai chuan Kolasib District Hospital a tlawh a, thawktute hnenah poor fund atan cheng singkhat a hlan bawk a ni.

Governor hian District Hospital, Kolasib Male Ward a fang a, thawktute kawmin district hospital tihchangtlun dan tur te a sawipui a ni. Governor chuan district hospital-ah damlo enkawlna khawl tha zawk a awm theih nan hma lakpui a tum thu thawktute chu a hrilh a, poor fund a hman turin Cheng Singkhat a hlan nghal bawk a ni. Governor hi Dr Robert Lalfakzuala, District Medical Superintendent, Dr Hmingthanmawii, CMO leh district Hospital a thawktu thahnem tak ten an lo hmuak a ni.

Governor hi Pi Sangchhin Chinzah, Deputy Commissioner, Kolasib district, Pu Vanlalfaka Ralte, SP leh official dangten Circuit House, Kolasibah an lo dawngsawng a, Mizoram Police ten Guard of Honour nen zahna chibai an lo pe bawk a in.

District hospital, Kolasib hi District Medical Superintendent kaihhruaina hnuai ah kalpui niin, DMS Orthopaedic Specialist bakah hian Specialist 7, Medicine, Gynaecologist, Pathology, Anaesthesiology, Surgery, Opthalmic leh Paediatric ahte an awm a ni. Hospital-ah hian Male ward ah khum 20, Female ward ah khum 20, Obstetric & Gynae ah khum 12, Isolation ward ah khum 6 leh Staff sick room ah khum 2 te a awm a ni.

Written by: Dr. Hmingthanzuala, MIS, DIPRO - KOLASIB  Dated: 2nd Feb 2020