Press Release of Governor

​MIZORAM GOVERNOR LEH POWERLIFTING HOTUTE INKAWM - 6th February 2019

Aizawl, 6th Feb, 2019 : Vawiin khan Mizoram Governor Pu Kummanam Rajashekharan chuan Pu Suresh Pai, International Coach for Power Lifting leh Mizoram Powerlifting Association hotute chu Raj Bhawan-ah an inkawm.

Mizoram Governor chuan Powerlifting chu tun aia mipuiten an hriatlar theih nan tanlakpui a huam thu leh Sports Minister pawh a sawipui tur thu a hrilh a. Mizote chu infiamna lamah nasa takin hma an sawn zel a, ramchhung leh rampawnah pawh Mizoram tihmingthatu an ni zel chu a lawmawm takzet a ni, a ti a. Powerlifting-a inhmang infiammi thalaite pawh tang sauh sauh tura fuihin an zinga mi engamawzatin medal leh chawimawina te an lo dawng tawh chu a lawmpui thu a hrilh bawk.

Pu Suresh Pai, International Coach for Power Lifting hova lo kal Mizoram Powerlifter-te chuan an harsatna hrang hrang Governor hnenah an thlen a. Tun dinhmunah Mizoram State Sports Council chuan Powerlifting hi sport discipline pakhat anga recognise mahse Olympics Committee berin a la pawm chiah loh thu leh World Games Committee erawh chuan Powerlifting hi sport/game chi khat anga a pawm thung thu an sawi. Mizoram Powerlifting Association President Pu Lalhlimpuia chuan Powerlifting hi Mizoramah kum 2010 atanga lar tan niin state pawnah pawh an infiammite chuan lawmman vawi engemawzat an lak tawh thu sawiin sum tanpuina chu hmu se Mizoram mi chak zawnna ‘Mizoram’s Strongest Man’ huaihawt an duh thu Governor hnenah a hrilh bawk. Pu Suresh Pai chuan powerlifter-te training thinna hmun Aizawl khawpuia Gym hrang hrangte a tlawh kual thu a sawi a, gym awm sate chu tha thawkhat mahse Mizo infiammiten an ngeih ber tur ‘high altitude training centre’ din a rawt a ni.

Written by: Mina Zoliani, MIS, IPRO Dated: 6th Feb 2019