Press Release of Governor

​MIZORAM GOVERNOR LEH UNION MOS INKAWM - 28th September 2016

MIZORAM GOVERNOR LEH UNION MOS INKAWM

Aizawl 28th September 2016: Nimina Mizoram rawn tlawhtu Union Minister of State (IC) Environment, Forest & Climate Change Pu Anil Madhav Dave chuan Mizoram Governor Lt.Gen.(Rtd) Nirbhay Sharma chu a chenna Raj Bhawan-ah hmuin Mizoram hmasawnna tur kawng hrang hrang an sawi.

Mizoram Governor Lt.Gen.(Rtd) Nirbhay Sharma chuan sorkar laipuiin hmarchhak bial a ngaihsak zual avangin hmasawnna nasa tak a thleng mek a, a hmun ngei tlawha hmarchhak bial mipuite dinhmun leh mamawh hriat hi ram hruaitute tih tur dik tak a n tiin Union Minizter Mizoram rawn tlawh chungah lawmthu a hrilh. Mizoram chu thlai leh thei eng pawh that duhna, ramngaw zau tak leh mau tamna hmun a nih thu leh ramhmul damdawi lamah a hausak thu hrilhin sorkar laipui pawhin heng kawngahte hian hmalakna lian zawk nei turin a chah a. Sorkar hmalakna hrang hrangah mipuite nen thawhho thiam chuan hlawhtlinna a hmuh theih zel a ni tih a sawi bawk.

Union Minister of State Pu Anil Madhav Dave chuan Prime Minister-in hmarchhak state-te tlawh turin ram roreltute a duh thu leh rampum state 29 tlawh kual a tumnaah a bultan nan Mizoram a rawn hman thu Governor a hrilh a. Mizoram leilung a thatzia leh mauah a hausakna chu hman tangkai dan zawn a, mau atanga thil siam dehchhuah hrang hrang chu sumdawnna lian takah siam tum a nih thu a sawi bawk. Hmarchhak bial state-te chu zinmite hip zual nan chei a, hemi atanga state mipuite hlawkna tur a siam theih a ni tih a sawi.

Union Minister of State hi Addl PCCF Meghalaya Pu B.S.Khawmawphlang, Principal Secretary-cum-PCCF Mizoram Pu Lal Ramthanga leh Chief Wildlife Warden Mizoram Pu Liandawla ten an tawiawm a ni.

WRITTEN BY MINA ZOLIANI, MIS, PIO TO GOVERNORDATED: 28TH SEPTEMBER 2016, 10:39 AM