Press Release of Governor

​MIZORAM LARSAP 21-NA ATAN P.S. SREEDHARAN PILLAI LAKLUH A NI - 5th November 2019

Aizawl, 5th November 2019 : Vawiin chawhma khan Circular Lawn, Raj Bhavan-ah Pu P.S. Sreedharan Pillai chu Chief Justice Ajai Lamba, Gauhati High Court chuan rinawmna thu tiam tirin Mizoram Larsap 21-na ni turin lakluh a ni.

Pu P.S. Sreedharan Pillai hi kum 1953 December 1 khan Venmony khua, Alappuzha District, Kerala State-ah a piang a. A nu leh pa te chu Pu V. G. Sukumaran Nair leh Pi Bhavani Amma te an ni a. A nupui Pi Reetha Sreedhar, nen fapa pakhat leh fanu pakhat an nei a ni. Zirna lamah B.A., LLB degree nei a ni a. Amah hi Dan Hremi, eizawnna lamah Ukil hlawhtling tak niin Kerela High Court-ah Ukil hna a thawk thin a, a nupui leh a fapa bakah an makpa pawh hi Ukil hnathawka eizawng an ni. Mipui rawngbawlna huanga mi inhmang mi tak niin Politics-ah a zuang lut a. Governor a ruat a nih hma thleng khan Bharatiya Janata Party(BJP) tana mi tangkai tak niin kum 2003 atanga 2006 thleng khan Kerela State BJP President nihna te pawh a lo chelh tawh a. Politics leh a eizawnna huang pawnlamah pawh vantlang tana mi in hmang tak a nih bakah Thuziak Mi niin lehkhabu tha tak tak a lo ziak tawh bawk a ni.

Vawiina Swearing in Ceremony -ah hian Oath of Office neih a nih hmain Chief Secretary Pu Lalnunmawia Chuaungo chuan Pu Ramnath Govind, President of India kutziak leh seal chuang Warrant of Appointment chu a chhiarchhuak hmasa a. He hunah hian Chief Minister Pu Zoramthanga, Speaker Pu Lalrinliana Sailo, Minister leh Minister of State te bakah MLA te an kal kim hle a. Official pawimawh Head of Office, Head of Department leh sawm bik mi pawimawhte te pawh an tel a. Governor chhungte bakah Governor then leh rual te he hun hmang tura Mizoram rawn thleng te pawh an thahnem hle a ni.

Swearing In Ceremony neih zawh veleh Official thlalak hmeh na hun neih a ni a, hemi hnu hian Chanchibumite kawmna neiin a office-ah a thu lut nghal a ni.

Written by: Malsawmsanga, MIS, PRO to Governor Dated: 5th Nov 2019