Press Release of Governor

MIZORAM LARSAP-IN LAWNGTLAI A TLAWH - 24th January 2019

Aizawl, 24th Jan, 2019 : Mizoram Larsap Pu Kummanam Rajasekharan chuan vawiin khan Lawngtlai a tlawh.

Larsap hian zing dar 9:10-ah helicopter-in Lawngtlai a thleng a. Lawngtlai District Police-in guard of honour lo pein, Lawngtlai Bawrhsap Pu N. Chakhai MCS, LADC CEM Pu T. Zakunga, LADC Chairman Pu V. Zirsanga, Lawngtlai SP Pu Amit Goel IPS leh official dangte'n an lo dawngsawng a ni.

LADC Complex-a amah lawmna inkhawm buatsaihah Larsap Pu Kummanam Rajasekharan chuan May ni 29, 2018-a Mizoram Governor-a a ṭhut ṭan aṭangin Mizorama Autonomous District Council (ADC) pathumte tlawh vek a duh thu a sawi ṭhin thu leh tuna a ṭum khat nan leh ADC zinga a hmasa ber atana Lawngtlai a lo tlawh thei ta chu lawmawm a tih thu a sawi a. Lawngtlai District chu Mizoram mai ni lo, India ram pumpui tan pawh district pawimawh tak niin, India hmarchhaka sumdawnna hmel thlak danglam dawrh tur Kaladan Multi Modal Transit Transport Project (KMMTP) kawngpui sial mekin a pal tlang district a nih bakah, India, Myanmar leh Bangladesh te ramri intawh khawmna hmun a nih bawk avangin Lawngtlai District leh a chhunga chengte chuan state leh ram pum hma hun atan mawhphurhna pawimawh tak an nei a ni, a ti.

India ram Danpuiin Sixth Schedule hnuaia Governor mawhphurhna a pek angin, Lawngtlai a tlawh hmasak berah Lai Autonomous District Council (LADC) hna thawh lama a insawr bing deuh thu sawiin, LADC a tlawh chuan a huam chhung tihhma sawnna atana LADC-in mawhphurhna a neihte a hriat thartir a, ṭan a pek ngei a beisei thu a sawi a. Hnam ziarang leh thil hlu vawn ṭhat kawngah Lai hnam chu an harh ṭha hlea a hriat thu sawiin, chu hnam ropui zia chu chhawm nung zel turin a chah a. Ram hma sawnna kawnga mipuite'n mawhphurhna an neihte hre chiang a, Mizoram leh India ram tana a ṭha thei ang bera hna thawk turin Lawngtlai District mipuite chu a sawmin a ngen nghal bawk.

He hunah hian LADC-a Chief Executive Member (CEM) Pu T. Zakunga chuan Larsap lawmna thu sawiin, Larsap-in LADC a tlawh chu Lai fate tan hun chhinchhiah tlak tak a ni tiin, Larsap hi Lai hnam thuam a lo pe a. YLA zaipawlin Lai hla an sak bakah, Lai hnam lam 'pawh loh tlawh' an entir bawk.

Amah lawmna inkhawm hman zawh hian Larsap chuan LADC Complex-ah Finance and Account Office building thar sakna tur lung phumin, Mizoram state thing 'herhse' a phun nghal a. Hemi hnu hian CEM Conference Hall-ah LADC-a Executive Member-te leh Department hotute kawmin, LADC huam chhunga chak zawka hma sawnna a kal theih dan tur an sawi ho va. Hemi hnu hian College Venga LIKBK din damdawi in Lairam Christian Medical Centre (LCMC) sak mek leh Electric Venga District Hospital te a tlawh leh a. Circuit House-ah state sawrkar hnuaia department hotute chu District hma sawnna tur a sawipui leh hnuin tlai dar 2:45-ah helicopter-in Aizawl a pan leh ta a ni.

Written by: C. Lalhruaitluanga, MIS, DIPRO - LAWGTLAI Dated: 24th Jan 2019