Press Release of Governor

​NFR Official ten Bairabi – Sairang Relkawng siam mek chungchangah Governor Hari Babu Kambhampati hmu - 24th November 2021

Aizawl, the 24th November 2021: Vawiin khan North East Frontier Railway (NFR) official te chuan Raj Bhavan-ah Governor Hari Babu Kambhampati an hmu a. He hunah hian Bairabi leh Sairang inkara 51.38 Km thui Rel kawng phah mek leh hmun 4 – Hortoki, Kawnpui, Mualkhang leh Sairang hmuna Rel Station sak meka hmasawnna leh chak zawka hna thawh theih dan tur an sawiho a ni.

He Rel kawng siam hna hi “National Project” atan 2008-09 khan puan a lo ni tawh a. Dt 29.11.2014 khan Pu Narendra Modi, Prime Minister of India chuan he project bultanna lungphum a phum a ni. Mizoram leilung in a zir loh vang te, hnathawh hun chhung a rei loh vang te leh harsatna thleng dang avangin he project zawh hun tura chhut chu tih danglam a ni zeuh zeuh tawh a. Tuna chhut dan thar berah chuan March 2024 khian he project hi zawh fel hman beisei a ni.

Governor Hari Babu Kambhampati chuan Mizoramin project pawimawh tak pahnih KMMTTP leh Rel Kawng siam hna a nei a. A pahnih hian a vei hle a, Mizoram state tana nasa taka hmasawnna thlentu a nih ngei dawn avangin siam zawh thuai a nghakhlel hle a ni a tih a sawi a ni. Rel kawng siamtute chu working season hun tawite chhungin theih tawp chhuah turin a chah a, an harsatna neih ang te central sawrkar dawr ngai chi leh state sawrkar anga tih fel theih chinah pawh theih tawp chhuahpui a lo tiam a ni.

NFR official te report pek dan chuan he project-ah hian hnathawh tur lian tham deuh chu 65 % zawh a ni tawh a. Heng hna lian tham deuh te chu : 375 Lakh cubic metre of Earthwork, 55 major bridges, 87 minor bridges, 12653 Metre length of tunneling works leh construction of 4 stations te a ni. NFR official te chuan he project pawimawh tak hi siam zawh thuai a nih theih nan State sawrkar pawhin theih tawp a chhuah pui a, khawtual mi te pawh hnathawh ti buai zawngin an khawsa lo a, lawmawm an tih thu an sawi a. Amaherawhchu, compensation phut a court a kal an awm deuh reng avang erawh chuan harsatna an tawh thu an sawi a. Ram neitu nihna inhlan chhawn pawh a la fel hlei thei lo a, tih fel thuai a nih theih nan Governor tanpuina an dil a.Rel Station panna kawng state sawrkarin a siam ve tur pawh siam thuai a nih theih nana hma lakpui turin an ngen bawk a ni.

Bairabi – Sairang Relkawng siam mek chungchanga Governor hova inkawmnaah hian state aiawhin Pu K.T. Beicho, Commissioner & Secretary, Transport leh Pu Hrangtawna, Consultant an tel a, NFR lam atangin Pu Naveen Prakash, Dy CE, Pu Harjimal Meena, Dy CE leh Pu Malay Baruah, EE te an tel thung a ni.

Written by: Malsawmsanga, MIS, Deputy Director Dated: 24th Nov 21