Press Release of Governor

​PATRON, MIZORAM BHARAT SCOUTS & GUIDES ATAN GOVERNOR P.S. SREEDHARAN PILLAI LAKLUH A NI - 12th February 2020

Vawiin chawhma khan Durbar Hall, Raj Bhavan-ah Governor P.S. Sreedharan Pillai chu Scouts & Guides thutiam chham tirin Patron, Mizoram Bharat Scouts & Guides(MBSG) atan lakluh a ni.

Governor P.S. Sreedharan Pillai chuan a tet laiin Scout a lo ni tawh thin a, puitlina kawng a zawh chhohnaah leh tun dinhmun a chelh theih chhanah pawh scout a nih laia a thilzir te pawh a tangkai thin tih a sawi a. Mizoram Bharat Scouts & Guides te tan Patron nihna hlan a ni chu a tan hlawhtlinna ropui tak a ni a ti. Scouts & Guides in a tum ber chu ram tana mi tangkai, khua leh tui tha leh mipuitling, a tam thei ang ber chher chhuah a ni a ti a. Scouts & Guides rawngbawlna huangah inthliarna a awm lova; a tel duh a piang te an tel thei a. Hei vang hian Scouts & Guides hmalakna leh thil tum hi India Danpui duhdan nen pawh a inang hle a ni a ti.

Mizoramah chuan mitin te hian mipui vantlang rawngbawlna kawngah te mahni tihtur an hriain an bengvar hle. Mizote khawtlang nun leh Scouts &Guides thiltum te pawh a inzul hle tih a sawi a. “Midangte tana thil tha tih leh midangte tana rawngbawlna hi Pathian rawngbawlna a ni tih hre chhunzawm a, khawtlang nunah a chhe lai siamthatu nih theuh kan tum zel pawh a ngai a. Kan rilru tina thintu, thalai zinga ruihlo hluar te leh natna tha lo tak tak inkaihchhawn chi ang te bakah mahni nun uluk loh avanga natna benvawn kan insiam ang te hi kan inthlah dah vang a ni thei a. Chuvangin, heng khawtlang hriselna atana hmelmate hi kan do hneh nan thalaite zingah Scouts & Guides movement hi kan vawrh lar zel pawh a ngai in ka hria”, a ti.

Kum 2019-20 chhunga MBSG hlawhtlinna leh hmalaknate Pu K.Lalthawmmawia, State Commissioner(S) hnen atangin ngaihthlak a ni a. Kum 2019-20 chhungin Scouts 5 leh Guides 22 te chuan Scouts & Guides India rama chawimawina sangber, Rastrapati/President Award an dawng a. State chhunga chawimawina sangber Rajya Puraskar/ Governor Award pawh Scouts 42 leh Guides 83 hnenah hlan a ni a. Cubs 39 leh Bulbuls 64 ten India rama chawimawina sangber Golden Arrow Award an dawng bawk a ni. Swachh Bharat Abhyan hnuaiah unit 74 te chuan School, Vantlang khelmual leh kawngsir thenfai hna an thawh bakah thing tiak tam tak an phun bawk a. Unit 3 te chu Hnuchham Inah te an hnatlang tawk bawk a ni. Tun dinhmunah Mizoram pum puiah Scouts 2223 leh Guides 2631 awm mekin an pahnih belh khawmin scots & guides 4854 an awm mek a ni.

Patron, MBSG atana Governor lakluhna programme tawi hi Pu K.Lalthawmmawia, State Commissioner(S), MBSG & Secretary to Governor chuan a kaihruai a. He hunah hian Governor chu Rev. Dr.C.L. Hminga, Vice Patron, MBSG chuan thutiam chham tirin Patron atan a la lut a. Pi L.Rohmingthanga, Vice President, MBSG chuan lawmthu sawiin programme hi a khar a ni.

Written by: Malsawmsanga, MIS, PRO to Governor  Dated: 12th Feb 2020