Press Release of Governor

​PM in State Governor te Covid19 dona kawngah nasa zawka inrawlh turin hrilh - 15th April, 2021

Aizawl, the 15th April 2021: Nizan dar 6:30 leh dar 9 inkarah khan Prime Minister Narendra Modi chuan Covid19 hrileng dona kawng leh Hridanna kalpui mek chungchangah State Governor te Video Conference kaltlangin hmalakna kal mek leh hmalak zel dan tur te a sawipui a. Governor P.S.Sreedharan pawh he hunah hian a tel a ni.

Covid19 dona kawngah khawvel pumah India ram chu hnathawk tha ber pawl a nih thu Prime Minister Narendra Modi chuan a sawi a. Vaccine lak a pawimawh tih a sawi fiah a. Testing, Tracking leh Tracing pawimawh zia sawinawn leh state tin te tan la chhunzawm turin a chah a. A bikin Covid19 test na atan RT-PCR Testing chu a pawimawh tih sawiin tuna 60% testing RT-PCR ni mek chu 70% ah hlan chhoh a ngai a ni a ti. India ram chu hridanna pek chhuak kawngah 10 crore vaccination puitlin hmasa ber a nih thu sawiin Tika Utsav ni 4 liam taa kalpuiin rah tha a thlen a, tan lak chhunzawm zel erawh a ngai a ti.

Prime Minister chuan State Governor te chu tunhma aia tan la tur leh an theihna zawnah inrawlh tam tur(Proactive role la tur) in a chah a. Chief Minster te hmalakna thlawp tlat tur te, a tul hun a pianga All Party Meeting ko tur te leh Webinar te hmang tangkaia thingtlangmite harsatna te sutkianpui dan zawng tur leh NGO leh Civil Society Covid 19 hrileng dona kawnga sawm turin Governor te chu a chah a ni.

Vice President Pu M.Venkaiah Naidu pawhin Governor te mawhphurhna sawiin constitutional head an nihna angin state tinah Chief Minister te hmalakna thlawp tlat tur te, thurawn te pe a, tanlak ngai lai te pawh kawhhmuh thin turin a chah a. 'Covid19 Appropriate Behavior - Hripui leng laka himna tura zawm leh nunpui ngai' zirtirna kawngah Media lam te, Kohhran hruaitute, College zirlaite leh Tlawmngai pawlte theihna te hmang thiam tur leh thawhpuia sawm turin Governor te chu a chah bawk a ni.

Vice President chuan Covid19 dona atan India in mamawh - vaccine, khawl mamawh, a thawktu, thiamna leh experience te a nei tha tawk a; a pawimawh ber chu a taka hmalakna kalpui huna tanrual leh thawhhona tha a ni a ti. Thawhhona tha a awm theih nan Governor te chu an theihna leh an thuneihna te hmangthiam turin a chah a ni.

Health Secretary, Ministry of H&FW report pekah India ramah Hmaikawr(Mask) vuah tha peih an tlem hle tih tarlan a ni a. India rama cheng mipui 50% chiah in Hmaikawr an vuah a; a vuah zingah hian 14% chiahin an vuah dik a, Mask vuah zinga 64% chu hnar hup loa vuah an ni a, 20% in an khabe tuam nan an hmanga, 2% in an awrh anga hriat a ni. Central Sawrkar chuan State tin te chu Covid 19 Appropriate Behavior zirtirna kawngah tan an lak a ngai tih Health secretary report ah hian tarlan a ni.

Pu R.Lalramnghaka, Special Secretary, Health & Family Welfare in report a buatsaih ang chuan April 13,2021 thleng khan Mizoramah Vaccine(Covishield) 1,11,086 Doses pekchhuah a ni tawh a. Mi 26,413 in Vaccine an la zo tawh a. Tun dinhmunah Mizoramin vaccine 2,00,480 doses a dawng tawh a. Vanneih thlak takin Vaccine lak avanga tlem a zawng harsatna thleng(Adverse Events Following Immunization) tum 491 chiah a la awm a ni. Tunah hian nikhat chhunga Vaccine dose pekchhuah zat chu 9000 doses anga chhut a ni.

Union Home Minister Amit Shah chuan he hun hi a kaihruaia; hun bul lamah Pu Rajesh Bhushan, Secretary, Miniatry of Health & Family Welfare chuan tuna Covid19 dona kawnga state hrang hrang hmalakna leh tanlak ngai laite Power Point Presentation hmangin a sawi fiah a.Hemi hnu hian Covid19 case punlunna state 7 atangin Governor ten report an pe a. Prime Minister Narendra Modi leh Vice President Pu Venkaiah Naidu ten thu an sawi a. He video conferencing pawinawh takah hian Union Health Minister Harsh Vardhan pawh a tel a ni.


Written by: Malsawmsanga, MIS, Deputy Director Dated: 15th Apr 21