Press Release of Governor

​ZEDA hotuen 70kWp SPV Power Plant of Raj Bhawan Complex siam thar chungchang Governor Hari Babu sawipui - 20th December 2021

Aizawl, the 20th December 2021: Vawiin khan Zoram Energy Development Agency (ZEDA) hotute chuan Raj Bhavan-ah Governor Hari Babu Kambhampati an hmu a. He hunah hian Raj Bhavan tana nizung chakna hmanga electric current pekchhuahna - 70 kWp SPV Power Plant bun thar chungchang te leh Mizoram hmun hrang hrangah mipui ten Nizung chakna hmanga eng leh current siamchhuah tangkai zia an hriat chian zawk dan tur te sawiho a ni.

ZEDA hotute hmalakna chu tha a tih thu Governor Hari Babu Kambhampati chuan a sawi a hmasa a. Mizoram mipui tam zawkin Nizung chakna hman tangkai erawh an la tum chiah lo nia a lan avangin ZEDA leh P&ED ten mipui zirtirna thiam taka, uar zawka an kalpui erawh a ngai a ni a ti. Governor chuan Solar Power siamna atan Offgrid aiin Grid-Connected system a pawimawh zawk nia a hriat thu a sawi a. Grid-Connected system-ah chuan mimalin Solar Power a hman sen loh chu electric pekna thirhruiah a pechhuak leh thin a, hei hi midang tan pawh a tangkai leh zel thei a ni a ti. Nizung eng chakna ringa Khawnvar siam(Solar Lamps) 1,44,705 lai zirlai pawl 10 chin hnuailam hnenah semchhuah a ni chu lawmawm a tih thu a sawi a. He hmalakna atang hian hmasawn tur a awm tih sawiin Ministry of New & Renewable Energy hnuaia scheme tha tak tak te hi Mizoram mipuiin tangkai lehzuala an hmang a ngai a ti a. Hemi kawngah hian ZEDA leh P&ED ten tihtur an la ngah hle a ni a ti.

ZEDA report in a tarlan dan chuan 90% Subsidy hnuaiah Village Council ten Solar Street Lights an lei thei a, Off Grid Solar PV Power Plant 90% subsidy hmangin sawrkar pisa leh mipui vantlang hmunhmaah te eng a chhit theih bawk a; zirlai class 10 chin leh a hnuailam tan 85% subsidy in solar lamp a lei theih bawk a ni. Heng bakah hian Grid Connected Solar Rooftop Systems hnuaiah mimalin Solar Power plant an siam tir thei a, sawrkar office building-ah te pawh a theih bawk a ni. Tunah hian Off Grid Solar PV Power Plant hi ZEDA in a kalpui a, Grid Connected Solar Rooftop Systems chu P&ED in a kalpui thung a ni.

Governor Hari Babul eh ZEDA hotute inkawmnaah hian Pu David Ramnunsanga, Director, ZEDA leh a thawpui te an tel a ni.

Written by: Malsawmsanga, MIS, Deputy Director Dated: 20th Dec 21