Larsap General (Dr) Vijay Kumar Singh (Retd) in World Homoeopathy Day 2025 lawmna a hmanpui
Aizawl, the 11th April, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan World Homoeopathy Day 2025 lawmna, Directorate of AYUSH, Health & Family Welfare Department buatsaiha Dawrpui Multipurpose Centre, Aizawla neih chu Khuallian niin a hmanpui. He hunah hian Health & Family Welfare Minister Pi Lalrinpuii chu Khualzahawm a ni. Kumin hian thupui atan ‘Adhyayan, Adhyaapan, Anusandhaan : Zirna, Zirtirna, Zirchianna’ tih chu hman a ni.
Khuallian Mizoram Larsap, General (Dr) Vijay Kumar Singh (Retd) chuan Homoeopathy chu Germany ram atanga bul tan ni mahse, India ramah a lar ber thung a ni tiin, “Khawvel pum huap ang pawhin India ramin Homoeopathy practice a ngah ber a ni,” a ti a. Homoeopathy chu natna enkawl nana him leh tlawm anih avanga chawilar a pawimawh thu tarlangin, “Homoeopathy hian natna chauh ni lo, a lo chhuahna tobul thlengin a chhui thin a ni,” a ti bawk.
Larsap chuan Mizote chu tunhma atanga damdawi chungchang thui tak hria an nih thu leh homoeopathy chu Mizorama thang zel thei a ni tih sawiin, zirna in leh sawrkar thuneitute chu homoeopathy chawilar kawnga hma la zel turin a chah a. Clinical Reasearch Unit (Homoeopathy) Civil hospital Aizawlte hnathawh fakawm a tih thu sawiin, tun aia nasa lehzuala tan la turin a fuih a. Homoeopathy Doctor leh zirlaite chu research lama tan la turte, zirchianna behchhana Homoeopathy tihhmasawn tum turin a chah bawk.
Khualzahawm Health & Family Welfare Minister Pi Lalrinpuii pawhin thu sawiin, Mizoramah AYUSH Doctor tlemte awm mahse, an hnathawh fakawm a tih thu a sawi a. National Health Programme hrang hrang kenkawhnaah AYUSH Doctor-te chu Health Department kutke pawimawh leh tangkai ber ber an ni chu lawmawm a tih thu sawiin, indaihlohna leh mamawhte pawh Sawrkarin a tul angin a buaipui zel dawn thu a sawi a. AYUSH System chawilar turin tun aia huaisen tura chahin, a bik takin Post Graduate Degree neite phei chu Clinic-te hawng a, an thiamna mipui tana chhawpchhuak turin a chah a ni.
He hunah hian Pu H. Lalengmawia, IAS, Commissioner & Secretary, Health & Family Welfare Department chuan kalkhawmte lawmna thu sawiin, Homoeopathy chanchin Dr. C. Vanlalhlimpuia, Sr. MO (AYUSH), Kolasib District hnen atangin ngaihthlak a ni a. Dr. Jonathan V.L. Tlankima, BHMS, MD (Hom) in Homoeopathy hmanga natna enkawl dan thenkhat case presentation a nei a. World Homoeopathy Day 2025 pual slogan inziaksiak tithate hnenah lawmman sem chhuah a ni a. Principal Director, Health and Family Welfare Department leh Director, Directorate of AYUSH ni bawk Dr. Lalthlengliani’n lawmthu sawiin hun hman a khar a ni.
Tun dinhmunah hian Homoeopathy Doctor zirchhuak hi Mizoramah 280 vel an awm a, heng zinga mi 7 te hian Homoeopathy Post Graduate Degree an nei a ni.
Written by: Dr. Lallawmkima Thangluah, MIS, PRO to Governor