Mizoram Larsap-in MoRTH, NHLML leh UD&PA Department hotute Ropeway Project chungchang a sawipui (Mizo)
Aizawl, the 17th June, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan Ministry of Road Transport and Highways (MoRTH), National Highways Logistics Management Limited (NHLML) leh Urban Development & Poverty Alleviation (UD&PA) Department hotute chu Raj Bhavan-ah kawmin, Sawrkar laipui ‘National Ropeways Development Programme – Parvatmala Pariyojana’ hmanga Mizorama Ropeway siam a nih theih nana pawimawhte a sawipui.
Larsap General (Dr) Vijay Kumar Singh chuan khawpui tawt zel tur ven nan ruahmanna hrang hrang neih a pawimawh thu leh hmalak ran chu thil tihmakmawh a nih thu sawiin, tun dinhmunah Aizawlah hmun awl a tam tawh loh avangin Sawrkar project kalpui turin Aizawl khawpui chhung chauh melh lova, hmun dangte pawh ngaihven tel zel a tul thu a sawi a. Inkalpawhna leh mipui veivahnate chu ngaihven hmasak ngai a ni tih sawiin, tlangrama chengte inkalpawhna atana Sawrkar laipui project tha tak Parvatmala chu tangkai taka hman a nih theih nana hmelhriata chhawr tangkai a tul thu a sawi a. Line Department dangte nen pawha inrawntlanga he scheme hi chhawr tangkai dan tur ngaihtuah tlan a tul thu a sawi bawk.
Pu Vinay Kumar, Addl. Secretary, MoRTH chuan Mizorama Ropeway project kalpui turin theihtawp chhuahpui an inhuam thu a sawi a. An hnuaia kalpui Parvatmala chu tlangrama inkalpawhna siam nana project tangkai tak a nih thu leh hemi atanga revenue 90% chu khawtual hmasawnna thawh nana hman theih a nih thu a sawi bawk.
He hunah hian UD&PA Secretary Pu Lalmalsawma Pachuau chuan PowerPoint Presentation hmangin Aizawl khawpui leh a chhehvela Ropeway Corridor hrang hrang din tura ruahmanna siam, ‘Ropeways Under Aizawl Sustainable Urban Transport Project (ASUTP)’ chungchang a sawifiah a. Aizawl leh a chhehvel 280 Sq. Km azauah khawpui tawt tihziaawm nan Comprehensive Mobility Plan siam a nih thu leh hemi hian project hrang hrang -Ropeway, Improve Pedestrianisation, Regional Truck Terminal, Bus & Truck Terminal, Improvement of Bus System leh adangte a huam thu a sawi bawk.
Meeting-ah hian Pu Ajit Roy, Secretary to Governor; Pu Jacob Lalawmpuia, Director, UD&PA; Pu Prashant Jain, Vice President, NHLML leh UD&PA Department hotute an tel a ni.
Dr. Lallawmkima, MIS, PRO to Governor