Chairman Dr Vanlaltanpuia’n MYC hmalakna hrang hrang Governor Hari Babu Kambhapati sawipui
Aizawl, the 20th January 2022: Vawiin chawhma khan Raj Bhavan-ah Governor Hari Babu Kambhampati leh Dr Vanlaltanpuia,MLA, Chairman, Mizoram Youth Commission (MYC) te an inkawm a. He hunah hian Mizoram thalaite’n hna hmuh na leh eizawnna atan thiamna an neih theihna tura MYC hmalakna pawimawh tak tak te bakah ngaihtuahna thar nena hmalak dan tur te an sawi dun a ni.
Governor Hari Babu Kambhampati sawmna angin Dr Vanlaltanpuia, Chairman, MYC chuan Mizoram thalai te tana MYC kalpui a nih dan te, tunhnaia an hlawhtlinna te bakah MYC din a nih dan te a sawi hmasa a. Hemi hnu hian Pu Donny Lalruatsanga, Secretary, MYC chuan kum 2020 leh 2021 inkara MYC hmalakna hrang hrang leh hlawhtlinnate Powerpoint hmangin a tarlang a ni.
Report ngaihthlak a nih hnu hian Governor leh MYC Chairman te chuan inkawmna an nei chhunzawm a. MYC hlawhtlinna leh hmalakna hrang hrang te chu tha a tih thu Governor Hari Babu Kambhampati chuan sawiin MYC hlawhtlinnaah Chairman leh a thawhpuite a lawmpui tih a sawi a ni. Tuna MYC hmalakna piah lamah Mizoram thalaite tana tangkai tur nia a hriat Skill CDevelopment Ministry hnuaia scheme tha tak tak te sawiin MYC leh LESDE lam hotuten heng te hi an bawhzui chak a ngai a ni a ti. MYC chuan thalaite eizawnna kawng kawhmuh kawnga a thawk tha thawkhat nia a hriat thu te a sawi a; training pek mai duh tawk lovin MYC chuan training nei zo tawh te hna zawn sak(placement) kawngah te pawh chak zawkin hma la chhunzawm zel se a duh thu a sawi bawk a ni.
Governor nen an inkawmnaah hian Dr Vanlaltanpuia, MLA chuan MYC chu thalai te tana din a nih angin a thawhtur bik pawh tuksak ni lo mahse thalaite tana khawvel thar siamna leh tih hmasawnna kawngah chuan a inrawlh thei deuh vek tih a sawi a. Lehkhathiam hna hmulo te tana thawhtur zawn sak leh thiamthil zirtir mai ni lovin thalai lehkha thiam sang lo te tan hlei hlei MYC chuan tan a la nasa a ni a ti. Hun reilote sawrkar hotute duhsakna changa Chairman a nih chhungin MYC in thalaite tan kawng tam takah remchanna an siam sak tih a sawi a. Hrileng karah pawh MYC chuan thalaite khawvel thar siam kawnga an hmalaknate an chawlhsan lova – nitin mi hnena hnathawk a eizawng te tana thiam thil Mistiri hna, Sipai tang duhte an tlin ngei theihna atana lo tahhriam, thalai zaithiamte chawikanna project atanga IAS leh Central Sawrkar hnuaia hna hrang hrang atana inziak tling tura thalaite tahhriamte te thlengin a thawk kawp vek a ni a ti. Mizo thalaite theihna nasa zawka haichhuah a nih theihna turin training na tur hmun – Aizawlah Youth Centre and Office cum Coaching Centre, Lungleiah Youth Centre, Serkawnah Incubation and Skill Training Centre leh Serchhipah Youth Centre te sak mek a ni a. Heng bakah hian district tinah Skill Development Training Centre siam turin proposal pawh Ministry-ah theh luh a ni tawh tih a sawi a. Ministry lamah he rawtna thehluh tak te hi pawm a nih theih nan Governor chu hmalak pui turin a sawm nghal bawk a ni.
MYC hian thalaite tan hmalakna pawimawh tak tak a kalpui mek a; kum rei tak hnuah All India Services a Mizo thalaite an tlin leh theih nan tunah hian mi 20 thlan chhuah atana Super IAS 20 Full sponsorship a kalpui chu mi 40 tan Super IAS 40- Full sponsorship ah a ti pung dawn a. JEE/NEET/IIT/SMATEE OFFLINE COACHING CLASS, Online Skills Development Programme courses with MZU leh SSC/IBPS COACHING CLASS tluang takin kalpui mek a ni a. Online kaltlanga hnathawh tur leh hlawhfa rawih tur zawnna Online Job Portal pawh tangkai taka hman mek a ni a, TV kaltlanga inzitirna “Thalaite Tukverh” leh “ Savunzial Programme” te pawh hlut a hlawh hle a. TV programme MYC buatsaih te hi Covid hrileng reh hunah thalaite chhim theih tura huaihawt chhoh pawh tum a ni. MYC hlawhtlinna lian tak pakhat chu Mizo thalai zinga Sipai tang duhte tana Rally hmaa intahhriamna buatsaih a ni a, he intahhriamna hmang tangkaitu tam tak awm tawhin 2020-21 chhung khan Mizo thalai 56 lai chu Sipaiah an inziahtlin phah tawh a ni.
Written by: Malsawmsanga, MIS, Deputy Director