Governor Hari Babu Kambhampati in MPSC member atan Pu Vanlaltlana la lut
Aizawl, the 1st December 2021: Vawiin chawhma khan Durbar Hall, Raj Bhavan-ah Governor Hari Babu Kambhampati chuan Pu Vanlaltlana Chief Engineer Retired chu Member, Mizoram Public Service Commission(MPSC) atan rinawmna thu tiam tirin a lalut.
MPSC member thar lakluhna hi Pi Renu Sharma, Chief Secretary chuan kaihruaiin he hunah hian Member, MPSC atana Pu Vanlaltlana ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan Pu Vanlaltlana, Chief Engineer(Retired), P&ED chu rinawmna thu tiam tirin Member, MPSC atan a la lut a ni.
MPSC member thar lakluhna hunah hian Dy Chief Minister Pu Tawnluia, Speaker Pu Lalrinliana Sailo, Cabinet Minister te, Minister te, MLA te, Official te leh sawmbik mi thenkhat te an tel a ni.
Pu Vanlaltlana hi Pu Remkunga leh Pi Chalnghaki te fa 7 zinga 5-na ni turin kum 1961 khan a lo piang a. Tunah hian a nupui fanaute nen Tuikhuahtlangah an cheng mek a ni.
Pu Vanlaltlana hi sawrkar hna a thawh lain mi rintlak tak, hnathawk tha leh sawrkar hnathawk pawl tana thawhhlawk tak a ni a. MPSC-ah pawh hian a mikhual lo hle a; vawi tam tak Group A recruitment interview-ah te Expert atan a lo thut tawh bakah Exam question paper te pawh a lo duang fo tawh bawk a ni.
Zirna lamah amah hi High School a zir lai atanga Master of Electrical Engineering(ME) a zir chhuah thlengin 1st Division chin chunglamah a passed vek thei a. Matrict Exam-ah Mizoram pumpuiah 1st Rank(Pakhatna) a lo hauh tawh a ni. Jadhavpur University, Kolkata atangin BE(Electrical) a passed a, University of Western Sydney, Australia atangin ME(Electrical) a passed thunga. Sawrkar hna a thawh chhung hian Energy Conservation for India chungchangah Yokohama – Yokohama khawpui, Japan-ah te pawh a lo in tat hriam tawh a. A hnathawhna P&ED hnuaiah pawh hmasawnna ruhrel lian tak tak amah hovin siam zawh a lo ni tawh bawk a. Mizoram Science, Technology & Innovation Council ah te Member a lo ni thin a. Sawrkar hnathawk intelkhawm pawlah te hruaitulu ber lo ni tawhin tlawmngai pawlah te pawh a lo inhmang nasa thin hle a ni.
Written by: Malsawmsanga, MIS, Deputy Director