Governor hnenah Due-Constitution Notification hlan

Aizawl, the 5th December, 2023: Chief Electoral Officer (CEO) Mizoram Pu Madhup Vyas, IAS kaihhruai CEO Team chuan vawiin tlai dar 4:00 khan General Election to the Mizoram Legislative Assembly, 2023 neih zawh taka thlan tlinte, thlan tlin an nihna Constituency leh an chuhna Political party chuanna ECI tihchhuah ‘Due-Constitution Notification’ chu General Legislative Assembly thar din a nih theih nan Election Commission of India (ECI) aiawhin Mizoram Governor Dr. Hari Babu Kambhampati hnenah an hlan.

Governor Dr. Hari Babu Kambhampati chuan boruak muanawm tak hnuaia General Election to the Mizoram Legislative Assembly, 2023 felfai taka zawhfel a ni leh Dan leh thupekte tha taka kenkawha zawm a ni chu lawmawm a tih thu a sawi a. Inthlanna neih zawh tak chu State dangte tana entawntlaka mawi leh hmuhnuam a nih thu sawiin, chhawmnun zel a pawimawh thu a sawi a. Hlawhtling taka inthlanna buatsaih a nih theih nana hmalatu CEO leh a thawhpuite bakah inthlan kaihhnawiha theihtawp chhuahtute hmalakna fakawm a tih thu a sawi bawk.

He hunah hian CEO Mizoram Pu Madhup Vyas chuan inhmelhriattirna neiin inthlanna buatsaih kawnga hmalak dante a tarlang a ni.

CEO Team-ah hian Addl. CEO-I Pu H. Lianzela, Addl. CEO-II Pu Amol Srivastava, Jt. CEO Pu James Lalnunmawia, Dy. CEO-I Pu R. Vanrengpuia, Dy. CEO-II Pu Henry C. Lalrawnkima leh ACEO Pu Vanlalhmachhuana te an tel a ni.

General Election to the Mizoram Legislative Assembly, 2023 neih zawh taka vote tlate chu nimin khan chhiar zawhfel a ni a. Mizoram puma vote tla zat (EVM a vote tla leh Postal Ballot hmanga vote tla zat belhkhawm) chu 82.26% a ni a. Hei hian kum 2018 inthlanpuia vote tla zat 81.11% chu a khum a ni.

ECI Notification dt.05.12.2023.pdf

 

Written by: Dr. Lallawmkima Thangluah, MIS, IPRO