Governor-in ICAR, Research Complex, Kolasib leh 1st IR Battalion HQ, Mualvum a tlawh
Kolasib dated 10th June 2022: Mizoram Governor Dr.Hari Babu Kambhampati chuan vawiin chawhma khan Indian Council of Agricultural Research Centre, Kolasib a tlawh a, ICAR mithiamten thlai leh ran zirbingna lehkhabu pathum an buatsaih, ‘Doubling Farmers Income through Scientific Cultivation of Ginger in Mizoram,’ ‘Package of Practices for Potential under-utilized Crop in Mizoram’ leh ‘Zobawng Local Indigenous Non-Descript cattle in Mizoram’ tih a tlangzarh a, Tribal Sub Plan hnuai a loneitute puihna tur hmanrua a hlan.
Mizoram Governor Dr. Hari Babu Kambhampati chuan ICAR hmalakna hnuai a Tribal Sub Plan kaltlanga Kolasib district chhung khaw panga atanga loneitu za (100) thlanchhuahte hmaah thu sawiin ei leh bar a intodelh tur a hmalak a pawimawh zia leh chumi tur chuan ICAR-a mithiamte tangkai tak a chhawr thin turin a chah a. Sawrkar laipui ruahmanna hnuai a mi rethei zawkte khawsak dinhmun chawikanna tur scheme hrang hrangte chu a nih tur ang taka a dawng tur awm tak ten hamthatna an hmuh a pawimawh thu sawiin chumi tur chuan mahni chanvo hriatchian chu mi tin mawhphurhna a nih thu a sawi. ICAR enkawlna hnuai a loneitute thil tharchhuahte chu man man zawk a tih ral a nih theih nan a hlutna tizual turin a sawngbawlna kawngah leh a tuam mawi dan thleng a hmasawn zel turin a chah bawk a ni.
Pu John LT Sanga, Deputy Commissioner Kolasib chuan Mizoram Governor Dr.Hari Babu Kambhampati-ina sawrkar hnuai a ham?hatna hrang hrangte mi rethei zawkte leh kuthnathawktute thleng pha tura a ngaih pawimawhnate chuan Sawrkar hnathawkte hnenah chona leh phurna thar a pek ngei a beisei thu a sawi.
Dr.S.Doley, Joint Director, ICAR, Mizoram Centre chuan ICAR hmalakna hrang hrang tarlanna hun hmangin Mizoram chhunga thlai leh ran awmte zirchian leh a ram leilung mil tura thlai leh ran chi ?ha zawk siam chhuah te, khawvel thiamna changkang zawk loneitute hnen a thlente chu an thil tum pawimawh tak a nih thu a sawi.
He hunah hian loneituten ICAR an chhawr tangkai dan leh hma an sawnpui dan sawi zauna hun an hmang a, ICAR, Kolasiba hnathawhna hmun thenkhatte fan kual niin Governor hian Tribal Sub Plan (TSP) hnuai a loneitu za (100) thlanchhuahte tan a Training buatsaih a hawng a, Dr. Lalhruaipuii, Senior Scientist in lawmthu sawina hun a hmang bawk a ni. Governor hian ICAR, Kolasib a hun a hman zawh hian 1st IR Battalion, Mualvum a tlawh leh bawk a ni.
Written by: Dr. Hmingthanzuala, MIS, DIPRO – KOLASIB