Governor-in Mamit leh Kolasib District Oil Palm Growers Hruaitute A Kawm

Aizawl, the 12th December, 2024: Vawiin chhun khan Mizoram Governor Dr. Hari Babu Kambhampati chuan Mamit leh Kolasib District-a Oil palm growers hruaitute chu Raj Bhavan-ah a kawm.

Governor Dr. Hari Babu Kambhampati chuan India-in hriak ei chi (edible oil) a mamawh tam zawk ram dang atanga a lakluh thu leh intodelh tura theihtawp a chhuah thu sawiin, Sawrkar laipui chuan National Mission on Edible Oils-Oil Palm (NMEO-OP) kaltlangin oilseed tam zawk thar turin tan a la chhunzawm zel a ni, a ti a. Mizoram chu oil palm thar tamna leh hriak ei chi kan lakluh tamna Malaysia anga theihna nei a nih tih sawiin, hemi kawngah hian theihtawp chhuah a tul thu a sawi bawk.

He hunah hian National Mission on Edible Oils-Oil Palm (NMEO-OP) kaltlanga kum 2022-2024 chhunga Oil palm hralhtute hnena viability gap payment tun thlenga Sawrkar laipuiin engemaw rokhawlhna avanga a la pek theih loh chunchang oil palm growers hruaitute’n an thlen chu Larsap chuan hma lak sakin, Sawrkar laipuia hemi buaipuitute pawh a biak sak nghal a ni.

 

Written by: Dr. Lallawmkima Thangluah, MIS, PRO to Governor