Governor in Tourism a hmalaknate Tourism Minister, official te leh NHIDCL hotute sawipui 

Aizawl, the 13th May 2022: Vawiin khan Raj Bhavan-ah Governor Hari Babu Kambhampati chuan Tourism Minister Pu Robert Romawia Royte leh Tourism Official te a kawm a. Mizoram chhunga Tourism department in hma a lak mek te, hmachhawp te, State Tourism project proposal hrang hrang Central Sawrkar hnena thehluh tawh leh a thlen chin te leh hmalak chhunzawm dantur te sawiho a ni. Tourism Minister leh Tourism Department Official te hi Pu Virender Jakhar, Executive Director, NHIDCL, Regional Office – Aizawl leh a thawpui ten an zawm leh a. He hunah hian Governor hovin Ministry of Tourism, Government of India in Mizoram chhunga NHIDCL te hnathawhtur a pek te sawiho leh a; project chhungah khung belh tha nia hriatte sawiho leh a ni.

Governor Hari Babu Kambhampati chuan Tourism department hmalakna chu a phurpui thu leh hna tha tak Mizoram tan an thawk nia a hriat thu Tourism Minister Pu Robert Romawia Royte hnenah a sawi a. Tourism Department in project hrang hrang a kalpui mek te, central sawrkara project a thehluhte leh hmathar lak an tumna te hriat chian a duh a. Mizorama Tourism Sector tih hmasawn chungchangah Pu G.Kishan Reddy, Union Minister of Tourism a hmu tawh tih sawiin a inhawng hle nia a hriat thu a sawi a. Pu Ganji Kamala Vardhana Rao, Director General(Tourism) pawh Mizoramin Tourism Sector-ah sum tam tak a lakluh theih thu leh eizawnna mi tam tak tak a siam theih dan te a sawipui tawh a. Union Minister leh Director General ten Mizoram chhunga Tourism Sector tihhmasawn chungchang an ngaihven hle nia a hriat thu a sawi a ni. Mizorama Tourist site te awlsam zawka Lengpui Airport atanga tlawhpawh a nih theih nan Helicopter service te UDAN Scheme hnuai atanga a dil theih thu sawiin he thilah hian Tourism Department pawh hma la thei se Khualzin tan awlsamna an siam sak ngeiin a rin thu a sawi bawk a ni.
Tourism Ministry lam hian Mizoram chhungah Khawthlirna(View Point) 26 NHIDCL an siam tir tur chungchangte pawh an hrilh thu sawiin he view point awmnaah te hian Dhaba/Dawrte te, Toilet/Zun leh ek thiarna/ Parking te dah tha nia a hriat thu te sawiin Tourism Department leh NHIDCL te chu hemi chungchangah hian inpawh takin thawkho thei se a duh tih a sawi a. Reiek Tlang chu a lar tawhin tlawhpawh tu a ngah tawh a; a tlawhtute tawmhulna leh zun leh ek thiarna pawh Ramngaw tichhe miah lova siam theih dawn te a awm chuan dap a hun tawh a. Kan Tourist site hrang hrangah pawnlam atanga khualzin rawn tlawhtute mamawh pawimawhte kan enchian deuh tha nia a hriat thu te pawh a sawi a ni.

Tourism Minister Pu Robert Romawia Royte chuan Governor leh Chief Minister ten Mizorama Tourism a hlawhtlin theih dan a hmuh chian bakah an phurpui chu department tan vanneihthlak a tih thu a sawi hmasa a. Tourism department dinhmun tawite sawi hmasain Department naupang tak, kum 1987-a I&PR atanga in dang a nih thu te, hmalakna pawh tunhnaiah nasa zawka kalpui chauh a ni thu te leh kumkhata budget an neih pawh Rs 10 crore vel chiah a nih thu te bakah staff hrim hrim pawh an nei tlem hle tih a tarlang a. Heti chung hian kum 2 vel chhungin Covid Pandemic karah nasa takin Tourism chuan theih tawp chhuahin hna tam tak a thawk a. Guidelines, Rules & Regulation leh Tourism kalpui tura tih tul hmasa te siam fel deuh vek tawh a ni a ti. India ramah hmahruaitu niin Responsible Tourism Policy 2020 siam a ni tawh a; he policy hnuaiah hian awmze nei takin Mizoram Tourism huanga hmalakna kalpui a ni dawn a, ram leilung leh ramngaw te ti chhe lo thei ang ber tur leh khualzinmite hipna hmun an buatsaihna hmuna chengte eizawnna tur thlenga ruahmanna siam a ni a ti. Pu Roberta chuan Tourism chi hrang hrang 15 Mizoramah kalpui theih nia a hriat thu leh heng zingah hian Eco-Adventure, Nature Based leh Culture Tourism huangah te Mizoramin hlawhtlin theihna a nei tha leh zual tih a sawi a. Kum 2019-2020 khan Lengpui Arport leh ILP Checking point hrang hranga a chhinchhiahna mumal tak an siam atanga a lan dan chuan khualzin 1.60 lakh( 14% of State Population) an rawn lut a, heng zinga 80% chu rawn zin khawthawng( sight Seeing) an nia, 10% chu sumdawnna leh hna kaihhnawih thila rawn zin leh a bak chu adventure neih duh avanga rawn zin leh sakhaw thila rawn zin te an ni tih a sawi bawk.

Ministry of DoNER, NEC, Ministry of Minority Affairs leh Ministry of Tourism bakah NABARD-ah te project siamin hnathawhna tur sum dil a ni a. Project thenkat chu kalpui mek a ni a, a then chu sanction awm tawh hna la tan loh te a ni a, thenkhat erawh central sawrkarah a la thang mek thu a sawi a ni. Tourism Minister Pu Robert-a chuan an project thehluh te nawr zui ngai te Governor hnenah kimchang zawk report an thehluh tur thu leh Governor chu lo nawrpui tura an duh thu te a sawi a. NITI Aayog in project reng reng an enfiah zel tak avanga khawmuang ta deuh a awm thin thu pawh a sawi lang bawk.

He meeting-ah hian Pu V.Lalengmawia, Joint Secretary/ CEO Mizoram State Tourism Authority chuan Tourism Department hmalakna leh chona hmachhawn mek te PowerPoint hmangin a sawifiah a. Report a tarlan dan chuan tunah hian Tourism Department enkawl thin Khualzin thlenna leh hmunhma 69 zinga 27 chu mimal sumdawngte an enkawl tir tawh a. Tunhmaa Tourism Department hnuaia awm ngai lo Hotel, Restaurant, Tour operator, homestay, travel agent, fair leh festival te chu Tourism Department thuneihna hnuaiah dah a ni tawh bawk a ni. Kutpui hrang hrang – Zo Kutpui, Peace Pays Festival, Anthurium Festival, Winter Festival leh a dang te huaihawt a ni a. Tunah hian Tour Guide 89 hnenah certificate pek a ni tawh a. Social Media lam kaltlangin theihtawpin Mizoram Tourism chu vawrh lar mek a ni.

Tourism Sector hnuaia project te a tarlang a. Special Assistance to States for Capital Expenditure (SASCE) – Rs.606.34 lakhs hnuaiah Beraw Tourist Resort chu cheithat a ni dawn a. Aizawl Convention Centre at Chite – Project Rs.3990 lakhs ah Meetings, Incentives, Conference/ Conventions and Exhibitions/ Events ( MICE Tourism) kalpui tum a ni a. NESIDS REIEK – Rs.560 lakhs hnuaiah Reiek Tlang leh a chheh vel chei hna thawh mek a ni. Swadesh Darshan – I ( Rs 9490 lakhs) hnuaiah Thenzawl, Zote leh Reiek ah te hmalak a ni a. Swadesh Darshan – II ( Rs 9907) hnuaiah Chaltlang, Durtlang, Sakawrhmuituai, Muthi, Beraw, Hmuifang, Tuirial Airfield, Khawhpawp leh Rawpuichhip ah te hmalak mek a Ecotourism site panna tur kawng siamna Tlungvel, Reiek leh Samtlang – Rs.200 lakhs theuh a thawh tur project siam mek a ni a, NESIDS KHAMRANG – Rs.800 lakhs pawh pawm tawh a ni a, sanction hmuh a la ni lo deuh a, PRASHAD – Pilgrimage Rejuvenation and Spiritual Augmentation Drive – Project hnuaiah Rs 5000 lakhs chuang Ministry atanga hmuh beisei a ni a; he project hian Khawruhlian, Laipuitlang, Serkawn, Ailawng, Reiek leh Zuangtui te a huam dawn a ni.

Sawrkar khualbuk sawrkarin a enkawl 42 leh sawrkar khualbuk mimal ten an enkawl 27 a awm a, Hotel 72 awm mekin room 608 hengah te hian a awm a. Private Homestay 13, sawrkarin a tanpuina hnuaia Homestay kalpui mek 77, Tour operator 8, Travel Agent 41 leh Tour Guide 89 te Mizorama khualzin lo kal te lo dawngsawng turin a awm mek a ni.
Governor leh Tourism Minister inkawmnaah hian Pi K. Lalrinzuali, Secretary leh Pu Saitluanga, Director, Tourism Department te pawh an tel a ni.
Governor chuan Tourism Department nen an inkawmnaah hian National Highways and Infrstructure Development Corporation Ltd(NHIDCL) te a ko tel a. NHIDCL aiawh hian Pu Virender Jakhar, Executive Director, NHIDCL, RO- Aizawl leh a thawhpuite an tel a ni.

Governor Hari Babu Kambhampati chuan NHIDCL hotute chu Ministry of Tourism in hnathawh tur an pekte Mizoramah engtia kalpui nge an tum tih te leh an hnathawh tur zat te a zawt a. State Tourism Department te pawh inrawn tlang thin turin a hrilh a ni. Executive Director, NHIDCL, RO- Aizawl chuan Mizoram chhunga kawngpui lian- National Highways siam hna an thawh mek hmun 26-ah View Point an siam dawn a. View Point pakhat siam nan hian Rs 2 Crore vel zel hman a ni dawn tih a sawi a. View point siamnaah hian Khawthlirna leh motor 5 dinna leng kawtzawl leh Zun in leh Ek in te a awm tel dawn a, he project hi siam zawh tawh niin thehluh tawh a ni a ti. Governor chuan View point apiangah hian enkawltu awm theihna tur quarter, dawrte/dhaba leh water tank dah tel tha a tih thu a sawi . NHIDCL lam chuan view point awmna hmuna ram an neih chu a zim thu te, compensation issue a awm dawn loh chuan an project thehluh tawh belhna an thehluh leh theih thu an sawi a.Mizoram mipui tana hmasawnna hnathawhna dal turin view sakna hmunah ram awl chungchangah chuan harsatna a awm a rin loh thu leh theih anga state sawrkar pawhin hma an lo lak tur thu Tourism Minister Pu Robert Romawia chuan NHIDCL hotute hi a hrilh a ni.

 

Written by: Malsawmsanga, MIS, Deputy Director