Project Pushpak Hotuten Governor Hari Babu Kambhampati an hmalakna sawipui

Aizawl, the 21st January 2022: Vawiin chawhnu khan Border Roads Organisation (BRO) hnuai Project Pushpak hotute chuan Raj Bhavan-ah Governor Hari Babu Kambhampati an hmu a. Mizoram hmun hrang hrang – a bikin ramri hrula kawngpui an siam mek chungchangte an sawipui.

Governor Hari Babu Kambhampati chuan BRO in ram himna tura theihtawp an chhuahna leh ramri venhimna atana tangkai kawngpui pawimawh tak tak an siam chu lawmawm a tih thu a sawi a. An hnathawh te thataka chhunzawm tur leh an hnathawhna harsatna an neih te pawh theih anga lo chinfel dan kawng zawnpui a tum thu a sawi a. He hunah hian Project Pushpak hnathawh mek bakah BRO in kawngpui an enkawl mek chungchangah Pu PN Yadav, Chief Engineer, Project Pushpak chuan powerpoint presentation a pe a. Tunah hian kawngpui 14, a vaia zawma a thui zawng Km 896 ah Km 757 BRO chuan an enkawl mek a. Heng te hi a pawimawh dan thliar hranga enkawl uluk deuh leh a then te phei chu enkawlna sum rawn lut tawh lo te a ni a. A bikin Mizoram chhim lamah kawngpui an siam mek te chu dah pawimawh deuh bik prioty – 1A anga an enkawl mek a ni a. Kawngpui pawimawh tak siam tura ruahmanna fel tawh re-alignment of Kawnpui – Durtlang – Aizawl leh kawngpui thenkhat priority – 1B a awm mek te chu siam a tul tawh hle a, he kawngpui hi siam a nih theih na turin priority – 1A ah hlankai a ngai a. He mi atan hian Governor chu theihtawp chhuahpui turin an ngen a. BRO te Camp nek chep zawnga mimalin ram an rawn chuh mek chungchangah Mizoram sawrkar puina an ngen bawk a ni.

Pu PN Yadav, Chief Engineer hi Col P. Awasthi, Director(Works) leh Col MK Khullar, Director(planning) ten an tawiawm a ni.

 

Written by: Malsawmsanga, MIS, Deputy Director