Union Commerce Minister in Thingzai lakluh chungchanga Governor Hari Babu Kambhampati ngenna rawn chhang

Aizawl, the 11th October 2022: Mizoram Woodbased Industry Owners Association(MWIOA) ten an ngenna anga Governor Hari Babu Kambhampati in Zokhawthar kaltlanga Teak leh Thingzai dang te lakluh a nih theihna tura Dr Piyush Goyal, Union Minister of Commerce & Industry hnena ngenna lehkha a thawn chu Union Minister chuan September 29, 2022 khan a rawn chhang a. Union Minister hian Teak leh Thingzai pangai te chu restricted list-ah a tel lo tih a rawn sawi.

Mizoram Woodbased Industry Owners Association(MWIOA) te chuan Zokhawthar atanga Teak leh Thingzai chi dang te lakluh kawnga an harsatna te Governor Hari Babu Kambhampati hnenah June 21, 2022 khan sawiin ziakin ngenna an thehlut nghal a. Hei hi Governor chuan July 23, 2022 khan Union Commerce Minister hnenah a thlensak a. Union Minister hnenah MWIOA te harsatna sutkiansak turin a ngen a ni.

Dr Piyush Goyal, Union Commerce Minister in a lehkha dated: September 29, 2022 hmanga Governor a rawn chhannaah hian: Governor ngenna te a lo zirchian tawh thu a sawi a. Thing chi 2 – Article HS 44039918 tia chhinchhiah( rough wood of red sanders) leh HS 44039922( rough wood of Sandalwood) te chu import policy hnuaiah bungraw lak luh khap a ni tih tarlang a. A bak thingzai dang zawng leh thingzai atanga thilsiam te chu Zokhawthar Land Customs Station kaltlangin khuahkhirhna awm lovin a lakluh theih tih a rawn ziak a ni.

Union Commerce Minister chuan Custom Act, 1962 hnuaiah Zokhawthar Land Customs Station, Champhai District, Mizoram chu Land Customs Station atan puan a ni tawh tih a rawn thai lang tel a. A chunga sawi tak te kaihhnawih thilah hian bawhzui tur a awm chuan chak takin bawhzui a ni ang tih a rawn sawi lang bawk a ni.

 

Written by: Malsawmsanga, MIS, Deputy Director